Ախալքալաքի մունիցիպալիտետի բյուջեի նախագծում ներառված չեն գերազանց ուսանողների կրթաթոշակների ծախսերը, ինչի մասին ուսանողները հայցել էին տեղական իշխանություններից խնդրագրի միջոցով, որը հաստատվել էր սակրեբուլոյի կողմից և ուղարկվել քաղաքապետարան՝ մշակման և իրականացման համար: Սակրեբուլոյում հիշել են ուսանողներին տված խոստումի մասին:
Այն բանից հետո, երբ դեռ սեպտեմբերին Սակրեբուլոյում ուսանողների խնդրագիրը հաստատվել էր և քաղաքապետարանին գրություն էր ուղարկվել՝ կրթաթոշակների տրամադրման համակարգ մշակելու խնդրանքով, այս խնդրագրի և կրթաթոշակի մասին որևէ նորություն չկար։
Ախալքալաքի մունիցիպալիտետի սակրեբուլոյի նախագահ Նաիրի Իրիցյանի խոսքով, գրության մեջ սակրեբուլոն խնդրել է մշակել համակարգ, որով ուսանողներին տեղական բյուջեից կրթաթոշակներ կհատկացվի։
«10-20 000 լարի գումար կհատկացնեինք, հետո կատեգորիաները կնայեինք: Եթե ոչ, ուրեմն հստակ կասենք, որ չենք տրամադրի: Հետո կմտածենք, թե ում և ինչ գումար կտանք։ Այն, որ պետությունը նրանց կրթաթոշակ է տալիս, դա մեր գործը չէ։ Ամենուր, մունիցիպալիտետներում հոդվածներ կան, և մենք կարող ենք կրթաթոշակ տալ մեր երիտասարդներին։ Միգուցե մյուս մունիցիպալիտետների բյուջեն մեծ է, և նրանք կարող են 1000-ական լարի հատկացնել, բայց մենք կարող ենք տալ 100 լարի, 10 լարի, սակայն մենք արդեն պետք է մի եղանակ մտածենք, և կամաց-կամաց սկսենք տրամադրել: Ես չեմ ասում, որ այնքան մեծ գումարներ հատկացնենք, որ դա խանգարի ճանապարհաշինության կամ աշխատավարձերի նման կարևոր խնդիրների լուծմանը։ Կարելի է սկսել փոքր, ֆիքսված գումարով: Մի բան կմտածենք, որ որոշենք, թե ինչ եղանակով դա անել, բայց պետք է հատկացնենք քաղաքապետարանից»,- բյուրոյի նիստի ժամանակ ասաց Նաիրի Իրիցյանը։
Նաիրի Իրիցյանը նաև հայտնեց, որ առաջիկայում հանձնաժողով կգումարվի՝ քննարկելու քաղաքապետարանի պատասխանն այս հարցի վերաբերյալ։
Հիշեցնենք, որ ուսանողների նախաձեռնող խումբը խնդրագիր է նախաձեռնել՝ հայցելով սահմանել խրախուսական կրթաթոշակ գերազանցիկ ուսանողների համար: Ուսանողները հավաքել են մունիցիպալիտետի շուրջ 400 բնակիչների (ընտրողների թվի ավելի քան 1%-ը) ստորագրություն՝ ի աջակցություն խնդրդագրի և այն ներկայացրել 2024 թվականի սեպտեմբերի 18-ին։ Խնդրագրի հեղինակը Ջուլիետա Սողոյանն է։
Պատգամավորները բյուրոյի նիստում որոշել են հարցն ուղարկել քաղաքապետարան հետևյալ առաջարկությամբ՝ մշակել խնդրի լուծման կոնկրետ մեխանիզմ, իսկ հաջորդ քննարկմանը, որպեսզի պարտադիր ներկա լինի քաղաքապետարանի ներկայացուցիչը:
Նշենք, որ կրթաթոշակներ տրվում են Սամցխե-Ջավախքի՝ Բորջոմիի, Ախալցիխեի և Նինոծմինդայի մունիցիպալիտետների ուսանողներին։ Յուրաքանչյուր մունիցիպալիտետ որոշել է կրթաթոշակի չափը՝ ելնելով իր հնարավորություններից, ինչպես նաև սահմանել է դրա տրամադրման պայմանները։
