«Փոփոխությունների համար» կոալիցիայի տեղական ներկայացուցչությունը պնդում է, որ ընտրությունների օրը՝ հոկտեմբերի 26-ին, թիվ 42 ընտրատեղամասում տեղի են ունեցել խախտումներ և կեղծիքներ։ Ըստ կոալիցիայի ներկայացուցիչների՝ Ընտրատեղամասային հանձնաժողովի անդամը ֆիզիկապես երկրում չի գտնվել, մինչդեռ հանձնաժողովի ամփոփիչ արձանագրության մեջ կա նրա ստորագրությունը, Շրջանային ընտրական հանձնաժողովում բացառում են, որ արձանագրության մեջ լինի ընտրությունների օրը ֆիզիկապես ներկա չգտնվող անձի ստորագրությունը։ Jnews-ը գնաց Բեժանո:
Ընտրությունների օրն ընդդիմությունը հայտարարել էր, որ Բեժանո գյուղի թիվ 42 ընտրատեղամասում բազմաթիվ խախտումներ են տեղի ունեցել։
Տեսանյութում, որը Jnews-ի խմբագրությանը տրամադրել էր «Փոփոխությունների համար» կոալիցիայի ներկայացուցիչը, երևում է, թե ինչպես է թիվ 42 ընտրատեղամասի հանձնաժողովի անդամը (ենթադրաբար նախագահը), ներողություն է խնդրում այն բանի համար, որ գյուղից ընտրողը քվեարկել է իր եղբոր համար: Խոստանալով, որ ԿԸՀ-ն կիմանա այս մասին, որ իբր սխալվել է ընտրական գործընթացի ժամանակ։ Կոալիցիան նաև նշում է, որ հանձնաժողովի անդամը, ով ստորագրել է այս տեղամասում ընտրությունների ամփոփիչ արձանագրությունը, ֆիզիկապես բացակայում էր երկրից և աշխատում էր Ռուսաստանի Դաշնությունում։ Խոսքը վերաբերում է Ռադիկ Մկոյանին, ով, ըստ տեղամասային հանձնաժողովի կազմի, հանձնաժողովի անդամ է Շրջանային ընտրական հանձնաժողովից, այսինքն՝ որևէ կուսակցության ներկայացուցչական անդամ չէ։ Հարկ է նշել, որ այս տեղամասում ընտրությունները չեն կայացել էլեկտրոնային համակարգով։
«Մենք նոր բան հայտնաբերեցինք, որ Մկոյան Ռադիկն ընտրությունների օրը Բեժանո գյուղում չի եղել, մինչ այսօր բացակայում է հանրապետությունից: Նա իր հայրիկի հետ Ռուսաստանում է՝ արտագնա աշխատանքի: Եթե ստուգեք այս գյուղի ընտրական արձանագրություններն, այնտեղ, ամենայն հավանականությամբ, կեղծ ստորագրություն կա, տեսականորեն նա կարող էր գալ ստորագրելու և գնար, բայց մենք համոզված ենք, որ նա այնտեղ չի եղել: Այս ամենը կարելի է ստուգել մաքսատանը և սահմանին։ Սա խախտում է, որ ՇԸՀ-ն, մասնավորապես Հասմիկ Մառանգոզյանը, պետք է իմանային, որ իր աշխատակիցները երկրում չեն և նրանց փոխարեն ստորագրել է այլ մեկը»,- ասում է «Փոփոխությունների համար» կոալիցիայի ներկայացուցիչ Հարություն Էվաջյանը։
Իրավիճակը պարզաբանելու համար Jnews-ը կապ հաստատեց Շրջանային ընտրական հանձնաժողովի հետ։ Առաջին զանգի ժամանակ Ախալքալաքի ՇԸՀ նախագահ Հասմիկ Մառանգոզյանն ասաց, որ ընդհանուր առմամբ նման բան անհնար է, բայց խոստացավ ճշտել:
«Ես ճշտեցի: Այս անձը երկրում է եղել, տեղում էլ աշխատել է և ստորագրել է։ Մնացածի մասին տեղյակ չեմ։ Բացառվում է, հնարավոր չէ, որ մարդը այնտեղ չի եղել, ինչպես կարող էր նա ստորագրել»,- ասաց նա։
Jnews-ի լրագրողները գնացել են Բեժանո գյուղ։ Մեզ տարբեր վայրերում հանդիպած 4 գյուղացիներ հայտնեցին, որ Ռադիկ Մկոյանն ու իր հայրը Ռուսաստանում են և մինչ օրս այնտեղ են։ Գյուղում քաղաքապետի ներկայացուցիչ Մարտիրոս Մարտիրոսյանը, ով հաշված րոպեների ընթացքում եկավ գյուղամեջ, որտեղ զրուցում էինք բնակիչների հետ, ասաց, որ Ռադիկ Մկոյանը երեկ (նոյեմբերի 18-ին) վերադարձել է գյուղ։
Հանձնաժողովի անդամը գյուղում եղել է և արդյո՞ք մասնակցել է ընտրություններին, որպես հանձնաժողովի անդամ, մնում է հարցական, բայց և՝ հեշտությամբ պարզվող հարց։
