Ախալքալաքում՝ թիվ 5 դպրոցի (նախկին գիշերօթիկ դպրոց) հարևանությամբ, շարունակվում են նոր մանկապարտեզի շինարարական աշխատանքները։ Շինարարները նախատեսում են աշխատանքներն ավարտել մինչև տարեվերջ։
Շինհրապարակի պատասխանատուի խոսքով՝ գործընթացը տեղում ընթանում է նախատեսվածի պես։
«Հիմա մենք երեսպատում ենք, բացի եղանակային պայմաններից, մեզ առ այսօր ոչինչ չի խանգարել։ Մենք չենք դադարեցնի աշխատանքը մինչև Նոր տարի: Եթե ոչինչ չփոխվի, մենք ժամանակին կավարտենք»,- ասաց նա:
Հիշեցնենք, որ աշխատանքների ավարտի ժամկետն արդեն մեկ անգամ երկարացվել է։ Մանկապարտեզն ի սկզբանե պետք է ավարտվեր այս տարվա սեպտեմբերին, սակայն ժամկետը երկարաձգվել է մինչև 2024 թվականի վերջ՝ չնախատեսված խնդիրների պատճառով, երբ շինարարության ընթացքում վնասվել էին քաղաքի ջրամատակարարման համակարգի ջրատարները։ Այս խնդիրների վերացումը ժամանակ պահանջեց, որի ընթացքում շինարարությունը կասեցվեց։
Իրականացվող աշխատանքների պատասխանատուի խոսքով, շենքի շատ սենյակներում արդեն ջեռուցում է անցկացվել, պատուհանները պատվիրված են ու շուտով կտեղադրվեն։
«Մենք ջեռուցումն ենք անցկացնում, որ բետոնը լցնենք, որոշ սենյակներում արդեն լցրել ենք»,- ասաց նա։
Նրա խոսքով, այս պահին շինհրապարակում աշխատում է 7-8 մարդ, այդ թիվը հասել է 18-ի, երբ անհրաժեշտ է եղել։ Աշխատողները և՛ տեղացիներ են, և՛ Թբիլիսիից։
Մանկապարտեզի կառուցման մրցույթը հայտարարվել է 2023 թվականի մայիսի 10-ին՝ Մունիցիպալ զարգացման հիմնադրամի կողմից, որը շահել է «IKB Build» ընկերությունը՝ 1 մլն 657 հազար լարիի չափով։ Համաձայնագիրը կնքվել է հունիսի 9-ին։
Հիշեցնենք, որ, ըստ մրցութային փաստաթղթերի՝ մանկապարտեզի շենքը նախատեսված է 75 երեխայի համար (25 հոգանոց 3 խումբ) և ներառում է(կարող է և չսահմանափակվել).
– Կենտրոնական նախամուտք,
– Սրահ,
– Խմբակային սենյակ 25 երեխայի համար [հանդերձարան, խաղա/ճաշասենյակ, ննջասենյակ, սանհանգույց, խոհանոց (բուֆետ)],
– Տնօրենի աշխատասենյակ,
– Պահեստասենյակ,
– Սպիտակեղենը պահելու սենյակ,
– Դահլիճ (երաժշտության և ֆիզիկական պարապմունքների համար), գույքի պահեստարան,
– Բժշկական գրասենյակ/մեկուսարան,
– Արդուկի և լվացքի սենյակներ,
– Մաքրուհու համար սենյակ սանհանգույցով և ախտահանիչ նյութերի պահեստով,
– Հաշմանդամություն ունեցող անձանց հարմարություններ սանհանգույց,
– Հանգստի սենյակ,
– Անվտանգության աշխատակիցների սենյակ:
