Վրաստանի բոլոր հանրային դպրոցներում, այդ թվում՝ Ախալքալաքի մունիցիպալիտետում, այսօր՝ սեպտեմբերի 16-ին, հնչեց առաջին զանգը։ Մունիցիպալիտետում այսօր ընդհանուր առմամբ առաջին անգամ դպրոց է հաճախել 590 աշակերտ։ Ախալքալաք քաղաքի 5 դպրոցներում կա 198 առաջին դասարանցի։
Նախորդ 2023 ուսումնական տարվա համեմատ Ախալքալաքի մունիցիպալիտետի դպրոցներում 27-ով ավելի առաջին դասարանցի կա, իսկ 2022-ի համեմատ՝ 90-ով պակաս։
Ախալքալաքի (Թումանյանի անվան հայկական) թիվ 1 հանրային դպրոցում սովորում է 36 առաջին դասարանցի, բացվում է 2 դասարան։ 2022 և 2023 թվականների համեմատ դպրոցն ընդունել է համապատասխանաբար 12-ով և 8-ով ավելի առաջին դասարանցի։
Թիվ 2 (ռուսաց) դպրոցն ունի 83 առաջին դասարանցի, բացվում է 3 առաջին դասարան։ Նախորդ 2023 թվականի համեմատ դպրոցն ընդունել է 3 աշակերտով ավելի, սակայն 2022 թվականի համեմատ՝ 7-ով պակաս առաջին դասարանցի։
Թիվ 3 (վրացական) հանրային դպրոցում սովորում է 27 առաջին դասարանցի։ Անցյալ տարվա համեմատ վրացական դպրոցն ընդունել է 8-ով ավելի աշակերտ, իսկ նախորդ տարվա ՝ 2022 թվականի համեմատ՝ 3 աշակերտով ավելի։
Թիվ 4 դպրոցը (հայկական, Դեմիրճյանի անվ.) ունի 44 առաջին դասարանցի, բացվում է 2 առաջին դասարան։ 2023-ի համեմատ դպրոց է ընդունվել 4-ով, իսկ 2022-ի համեմատ՝ 13-ով պակաս առաջին դասարանցի։
Թիվ 5 դպրոցում (հայկական, նախկին գիշերօթիկ դպրոց) սովորում է 8 առաջին դասարան, բացվում է 1 առաջին դասարան։ Դասարանը բացվել է անցյալ տարի 9 աշակերտով, իսկ 2022 թվականին դպրոցն ունեցել է 15 առաջին դասարանցի։
