Ինչպես անցած, այնպես էլ այս տարի Ախալքալաքի մունիցիպալիտետի ճանապարհների ձնեմաքրման աշխատանքներ կիրականացնի «ՋավախԱվտոԳզա» ընկերությունը։ Անցած տարվա էլեկտրոնային մրցույթի ժակետը երկու տարի է, որը ներառում է նաև այս տարին։

Քաղաքապետարանից Jnews-ին հայտնեցի, որ ընկերությունը պատրաստ է իրականացնել ձնեմաքրման աշխատանքներ յուրաքնչյուր պահի, երբ քաղաքապետարանից պահանջ լինի։

«Մեր հայտարարած էլեկտրոնային մրցույթի պայմանագիրը երկու տարի ժամկետով է «ՋավախԱվտոգզա» ընկերության հետ։ Անհրաժեշտության դեպքում նրանք պատրաստ են աշխատելու, մեզանից մնում է հրահանգ։ Մեր քաղաքապետարանի համապատասխան ծառայությունը հենց որ գյուղերից ստանում է տեղեկություն, որ ճանապարհները փակ են, ապա նրանք անմիջապես կապ կհաստատեն «ՋավախԱվտոԳզա» ընկերության հետ, որպեսզի համապատասխան աշխատանքներ տարվեն», — ասաց Ախալքալաքի քաղաքապետ Մելքոն Մակարյանը։

Քաղաքապետը նաև նշեց, որ անցած տարվա պայմանագրում փոփոխություններ չի արվել։ Ըստ այդմ՝ ձյունից պետք է մաքրվեն ինչպես Ախալքալաք քաղաքի որոշ փողոցներ, այնպես էլ գյուղական ճանապարհներ։ Անհրաժեշտության դեպքում պետք է մաքրվեն հետևյալ ուղղությունները.

• Վաչիան-Հոկամ-Քարսեպ-Գոգաշեն՝ 24 կմ,
• Սուլդա-Մյասնիկյան-Էրինջա-Դավնիա՝ 12,5 կմ,
• Կարծախ-Ֆիլիպովկա խաչմերուկից՝ 2,5 կմ,
• Սուլդա-Դադեշ՝ 4 կմ,
• Կարծախ-Դադեշ խաչմերուկից՝ 2 կմ,
• Չամդուրա-Մուրջախեթ-Վաչիան մայրուղու խաչմերուկից՝ 2,5 կմ,
• Խորենիայի ճանապարհը կենտրոնական ճանապարհի խաչմերուկից՝ 2 կմ,
• Ախալքալաք-Բավրա-Կարտիկամ-Թախչա-Աբուլ՝ 14 կմ,
• Կարտիկամ-Բուզավեթ՝ 3,5 կմ,
• Ախալքալաք-Դիլիսկա-Պտենա-Չունչխա՝ 11 կմ,
• Բակուրիանի-Խուլգումո-Կուլիկամ-Կարտիկամ ճանապարհի խաչմերուկից՝ 5 կմ,
• Բակուրիանի-Մաջադիա-Թոթխամ ճանապարհի խաչմերուկից՝ 5,5 կմ,
• Բակուրիանի-Թոթխամ-Կորխ ճանապարհի խաչմերուկից՝ 2,5 կմ,
• Բակուրիանի-Օրջա-Խանդո-Վարեւան-Ալաստան-Կոկիո-Ազավրեթ ճանապարհի խաչմերուկից՝ 23,5 կմ,
• Արագվա-Գոման-Օլվարեդ՝ 7 կմ,
• Բակուրիանի-Զակ-Տրկնա-Գոման ճանապարհի խաչմերուկից՝ 5 կմ,
• Գոման-Բալխո-Բուղաշեն-Մերենիա-Էխտիլա՝ 10 կմ,
• Բակուրիանի-Բարալեթ-Էխտիլա-Փոքր Սամսար-Մեծ Սամսար ճանապարհի խաչմերուկից՝ 15կմ,
• Կաջո-Ագանա-Սիրկվա՝ 3,5 կմ,
• Բարալեթ-Կաջո-Ալաթուման-Բեժանո՝ 10 կմ,
• Բակուրիանի-Մոդեգամ ճանապարհի խաչմերուկից՝ 2,5 կմ,
• Բակուրիանի-Ղադոլար-Բուռնաշեթ-Ազավրեթ ճանապարհի խաչմերուկից՝ 3 կմ,
• Բակուրիանի-Լոմատուրցխ-Բուռնաշեթ ճանապարհի խաչմերուկից՝ 2 կմ,
• Բակուրիանի-Տուրցխ ճանապարհի խաչմերուկից՝ 1,5 կմ։

Ընդհանուր առմամբ, ձյունից կմաքրվի 174 կմ գյուղական ճանապարհ:

Պետք է մաքրվի նաև Ախալքալաք քաղաքի հետևյալ փողոցները՝

• Ազատություն,
• Նալբանդյան,
• Չարենց,
• Թումանյան,
• Թամար Թագուհի,
• Մաշտոց,
• Դարբինյան,
• Մալխասյան,
• Ճավճավաձե,
• Ռուսթավելի,
• Միկոյան,
• Մարգարյան,
• Ջավախիշվիլի,
• Գուսան Հավասի։

Ձնեքրման աշխատանքները ներառում են ինչպես մաքրում գրեյդերով (կցովի հողափոր-հարթեցնող մեքենա), այնպես էլ ռեագենտի լցնում:

«ՋավախԱվտոԳզա» ընկերությունը էլեկտրոնային մրցույթը հաղթել է 199 939 լարիով։

Հարկ է նաև զգուշացնել վարորդներին, որ 2024 թվականի հունվարի 1-ից Վրաստանի կառավարությունը կսահմանի ճանապարհների հատուկ գոտիներ և հատվածներ, որտեղ պարտադիր կլինի ձմեռային անվադողերի օգտագործումը, իսկ հատուկ օդերևութաբանական պայմաններում՝ նաև հակասողանքային շղթաների առկայությունը։ Դեկտեմբերի 1-ից մարտի 1-ը բարձրալեռ շրջաններում կներդրվի ձմեռային անվադողերի պարտադիր օգտագործումը, իսկ խախտման դեպքում հնարավոր է նաև տուգանք։

Բացի այդ, փոփոխություններ են կատարվում «Վարչական իրավախախտումների մասին» օրենսգրքում, որոնք նախատեսում են ձմեռային անվադողերի օգտագործման կանոնները խախտողների համար 100 լարի տուգանք մտցնել։ Բացի այդ, վարորդը նաև կկորցնի 5 միավոր՝ իր վկայականին շնորհված 100 միավորից։

Եթե այս խախտումը հայտնաբերվի, ոստիկանությունն իրավունք կունենա վարորդին արգելել երթևեկել գոտում կամ այն ճանապարհով, որտեղ պարտադիր է ձմեռային անվադողերի օգտագործումը։

Բացի այդ, ոստիկանությունն իրավունք ունի տրանսպորտային միջոցը տեղափոխել հատուկ կայանատեղի, և վարորդը ստիպված կլինի ինքը վճարել դրա դիմաց։