Ախալքալաքի մունիցիպալիտետի քաղաքապետարանի կողմից հայտարարված վճարովի ստաժավորման ծրագրի շրջանակներում չորս հաստիքի համար դիմել է մոտ 40 մարդ։ Հայտերի ուսումնասիրությունից հետո ընտրության երկրորդ փուլ՝ հարցազրույցի, է անցել 14 թեկնածու։ Հարցազրույցի արդյունքներով հանձնաժողովը կընտրի երեք ստաժորի։
Սեպտեմբերի 1-ին Ախալքալաքի մունիցիպալիտետի քաղաքապետարանը պետական վճարովի ստաժավորման ծրագրի շրջանակներում չորս թափուր հաստիքի համար մրցույթ էր հայտարարել։ Հայտերի ընդունումը շարունակվել է մինչև սեպտեմբերի 10-ը ներառյալ։ Ընդհանուր առմամբ մրցույթին մասնակցելու համար ներկայացվել է մոտ 40 հայտ։
Դիմողների թվում են բարձրագույն ուսումնական հաստատությունների այս տարվա շրջանավարտներ և վերջին կուրսերի ուսանողներ։ Հայտեր են ներկայացրել նաև երիտասարդներ Վրաստանի այլ շրջաններից։
Քաղաքապետարանում հայտարարված էին հետևյալ թափուր հաստիքները՝
- Իրավաբանական ծառայության մասնագետ,
- Գնումների ծառայության մասնագետ,
- Վարչական ծառայության հասարակայնության հետ կապերի բաժնի ծրագրավորող,
- Տնտեսական ծառայության մասնագետ։
Ինչպես հայտնեց Ախալքալաքի մունիցիպալիտետի քաղաքապետարանի գործավարության և կադրերի բաժնի ղեկավար Նորա Պապոյանը, հասարակայնության հետ կապերի բաժնի ծրագրավորողի թափուր հաստիքը կչեղարկվի, քանի որ թեկնածուներից ոչ մեկը չի համապատասխանել սահմանված պահանջներին։
«Մեզ մոտ ծրագրավորող-ստաժավոր չի լինի, իսկ մյուս երեք հաստիքների համար ունենք մեր պահանջներին համապատասխանող ստաժորների թեկնածուներ։ Հաջորդ շաբաթ նրանց կհրավիրենք հարցազրույցի և կընտրենք։ Մոտավորապես երկու թափուր հաստիքի համար ստացվել է 12-ական հայտ, մյուսների համար՝ 7 և 9 հայտ», — ասել է Նորա Պապոյանը։
Ընտրության առաջին փուլի արդյունքներով երկրորդ փուլ է անցել 14 մարդ։ Հաջորդ շաբաթ թեկնածուների հետ կանցկացվեն հարցազրույցներ, որից հետո հանձնաժողովը կընտրի երեք հոգու, որոնք կընդգրկվեն ստաժավորման ծրագրում։
Պետական վճարովի ստաժավորման ծրագիրն իրականացվում է Վրաստանի վարչապետի նախաձեռնությամբ՝ 2024 թվականից։ Դրա հիմնական նպատակն է բարձրագույն ուսումնական հաստատությունների վերջին տարիների շրջանավարտներին պետական հաստատություններում աշխատանքային գործնական փորձ ձեռք բերելու հնարավորություն տրամադրելը։ Իշխանությունները նշում են, որ ծրագիրը նաև նպատակ ունի երիտասարդ մասնագետներին ներգրավել պետական հատված։
