Սեպտեմբերի 1-ից Ախալքալաքի մունիցիպալիտետի քաղաքապետարանը պետական վճարվող ստաժավորման ծրագրի շրջանակում չորս թափուր հաստիքի համար մրցույթ է հայտարարել։ Դիմումների ընդունումը կտևի մինչև սեպտեմբերի 10-ը։
Ծրագրի շրջանակում հասանելի են հետևյալ թափուր հաստիքները․
- քաղաքապետարանի իրավաբանական ծառայության մասնագետ,
- մասնագետ գնումների ծառայությունում
- քաղաքապետարանի վարչական ծառայության հանրային կապերի բաժնի ծրագրավորող,
- մասնագետ տնտեսության ծառայությունում
«Եթե ստաժորները համապատասխանեն մեր պահանջներին, թափուր աշխատատեղերի առկայության դեպքում մենք նրանց աշխատանքի կընդունենք։ Ստաժավորումը ձևական բնույթ չի կրում․ դրա նպատակն է հետագայում երիտասարդ մասնագետներին աշխատանքի ընդունելը», — ասում է Ախալքալաքի մունիցիպալիտետի քաղաքապետարանի վարչության ղեկավար Վաչագան Ծորմուտյանը։
Դիմումների ընդունումը մինչև սեպտեմբերի 10-ն է։ Մրցույթը կանցկացվի երկու փուլով։ Առաջին փուլում կքննարկվեն ծրագրի պահանջներին համապատասխանող թեկնածուների դիմումները։ Երկրորդ փուլում թեկնածուները կմասնակցեն հարցազրույցի։
Ախալքալաքի մունիցիպալիտետի քաղաքապետարանի վարչության ղեկավար Վաչագան Ծորմուտյանի խոսքով, ծրագիրը բաց է սահմանված պահանջներին համապատասխանող բոլոր ցանկացողների համար։
Պետական վճարվող ստաժավորման ծրագրին կարող են մասնակցել բուհերի այն շրջանավարտները, որոնք ուսումն ավարտել են տվյալ տարում, ինչպես նաև վերջին կուրսի ուսանողները։
Ծրագիրն իրականացվում է Վրաստանի վարչապետի նախաձեռնությամբ՝ 2024 թվականից։ Դրա հիմնական նպատակն է բարձրագույն ուսումնական հաստատությունների նորավարտներին պետական կառույցներում գործնական աշխատանքային փորձ ձեռք բերելու հնարավորություն ընձեռելը։
Իշխանությունների գնահատմամբ, նախաձեռնության շնորհիվ պետական հաստատություններում աշխատանքի է ներգրավվում մասնագետների նոր սերունդ։
Ախալքալաքի մունիցիպալիտետում կհայտարարվի վճարովի ստաժավորման հավաքագրում
