Կրթության, գիտության և երիտասարդության նախարար Գիվի Միքանաձեի որոշմամբ՝ Ազգային ուսումնական պլանում փոփոխություններ են կատարվել։

Փաստաթղթի համաձայն՝ կիսամյակի ընթացքում հանրային դպրոցի աշակերտը գնահատվելու է հետևյալ երեք բաղադրիչներով՝ ա) ընթացիկ տնային աշխատանք, բ) ընթացիկ դասարանական աշխատանք, գ) ամփոփիչ առաջադրանք։ Բոլոր բաղադրիչները կունենան հավասար կշիռ։

Միևնույն ժամանակ, նույն փաստաթղթի համաձայն, եթե աշակերտի տարեկան գնահատականը որևէ առարկայից 5.0-ից ցածր է, դպրոցը պարտավոր է աշնանային քննությունից առաջ աշակերտին առաջարկել ռեմեդիացիայի ծրագիր։

«Եթե հանրային դպրոցը որոշում է որևէ առարկայից կամ առարկաներից աշակերտի գնահատման համար օգտագործել միայն ամփոփիչ բաղադրիչը, այն պարտավոր է համապատասխան հիմնավորում ներկայացնել այն կրթական ռեսուրս-կենտրոնին, որի գործունեության տարածքում գտնվում է դպրոցը՝ համաձայնեցման համար։ Աբխազիայի և Աջարիայի ինքնավար հանրապետությունների տարածքներում գտնվող հանրային դպրոցների դեպքում հիմնավորումը նույն կարգով ներկայացվում է կրթության ոլորտում համապատասխան իրավասու նախարարությանը։

Ամփոփիչ առաջադրանքի բաղադրիչում պարտադիր է ստեղծագործական և համատեքստային առաջադրանքների կիրառումը, որոնք պահանջում են ստացած գիտելիքների գործնական կիրառում և համալիր խնդիրների լուծում (օրինակ՝ շարադրություն, նախագիծ, հետազոտական/դաշտային հաշվետվություն, ստեղծագործական աշխատանք, տվյալների վերլուծություն և այլն)։ Ամփոփիչ առաջադրանքի վավերականությունն ու օբյեկտիվությունն ապահովելու համար պարտադիր է նախապես մշակված գնահատման չափանիշների (գնահատման ռուբրիկների) կիրառումը, որոնք ուսումնական գործընթացի թափանցիկությունն ապահովելու նպատակով նախապես տրամադրվում են աշակերտին։

Եթե հանրային դպրոցի աշակերտը բացակայության պատճառով չի կարողանա կատարել որևէ ամփոփիչ առաջադրանք, դպրոցը պարտավոր է նրան հնարավորություն տալ լրացնելու բաց թողնված ամփոփիչ առաջադրանքները։ Ամփոփիչ առաջադրանքների լրացման ժամկետները և անցկացման ձևը սահմանվում են դպրոցի ուսումնական պլանով։

I–IV դասարաններում և V դասարանի առաջին կիսամյակում գնահատման բոլոր բաղադրիչներում կիրառվում է միայն զարգացնող գնահատում։ Միևնույն ժամանակ, տարրական աստիճանում (I–VI դասարաններ) տնային աշխատանքի բաղադրիչը գնահատվում է միայն զարգացնող գնահատման միջոցով։

Հոսպիտալացման հետևանքով ուսման դժվարությունների դեպքում դպրոցը պարտավոր է ուսուցումն ու գնահատումն իրականացնել ռեմեդիացիայի ծրագրի միջոցով և(կամ) աշակերտին տրամադրել տնային ուսուցման հնարավորություն», — ասվում է Ազգային ուսումնական պլանում։