Այսօր՝ հուլիսի 31-ին, Ախալքալաքի մունիցիպալիտետի սակրեբուլոյի նիստում, օրակարգի հիմնական հարցերից բացի, պատգամավորները բարձրացրին քաղաքային ենթակառուցվածքներին վերաբերող կարևոր հարցեր: Քննարկման ընթացքում պարզվեց, որ նոր ջրամատակարարման համակարգի կառուցման նախագիծը կրկին քննարկվում է։
Jnews-ը իր նյութերում հաճախ է անդրադառնում քաղաքային ենթակառուցվածքների թեմաներին, այդ թվում՝ ջրատար խողովակների փոխարինումից կամ տեղադրումից հետո մնացած վնասված ասֆալտի ծածկի խնդրին: Հեռացված ասֆալտե շերտը ամիսների կամ տարիների ընթացքում լցվում է ջրով, ընդարձակվում, և արդյունքում քաղաքի փողոցների և մայթերի մեծ մասում առաջանում են մեծ փոսեր։
Այսօրվա նիստում պատգամավորները քաղաքապետարանի ներկայացուցիչներից հետաքրքրվեցին ասֆալտե ծածկույթի վերականգնման ժամկետների, ինչպես նաև վնասի համար հնարավոր պատասխանատվության ենթարկելու լծակների մասին։
«Քաղաքում կան փողոցներ, որտեղ անցկացվել են ջրատարներ: Այնտեղ, որտեղ տեղադրվել են խողովակներ, ասֆալտե շերտը հանվել է: Ինչպես մենք հասկանում ենք, այս հարցը պետք է լուծի ոչ թե քաղաքապետարանը, այլ ջրամատակարարմամբ զբաղվող ընկերությունը: Արդյո՞ք պետք է դիմենք նրանց՝ իրենց պարտավորությունները կատարելու համար, թե՞ ի՞նչ է անհրաժեշտ անել: Գրեթե բոլոր փողոցներն ունեն նմանատիպ հատվածներ, և հասկանալի է, որ այնտեղ փոսեր են առաջանում։ Եթե նրանք պետք է վերանորոգեն ծածկը, ապա պետք է վերանորոգեն։ Բայց, ինչպես տեսնում ենք, տարիներ շարունակ նրանք չեն վերանորոգել իրենց կողմից վնասված ասֆալտը», — քաղաքապետարանի ներկայացուցիչներին հարցրեց սակրեբուլոյի պատգամավոր Հակոբ Չախմախչյանը։
Ինչպես պարզաբանեցին քաղաքապետարանի աշխատակիցները՝ նախատեսվում է սկսել նոր ջրամատակարարման համակարգի կառուցումը՝ սկսած Աբլարից, որտեղ գտնվում է Ախալքալաքի ջրամբարը, և որտեղից քաղաքը ստանում է իր ջուրը։ Նրանք նշեցին, որ նոր համակարգը նախատեսվում է կառուցել, բայց հին ցանցով ջրամատակարարումը չի դադարեցվի մինչև նոր համակարգի լիարժեք շահագործումը։ Նոր համակարգը, ենթադրաբար, հնարավորություն կտա հետագայում վերահսկել ջրի սպառումը և տեղադրել ջրաչափեր ամբողջ քաղաքում։
«Քաղաքապետարանը նաև բազմաթիվ նամակներ է ստացել այս ընկերության հետ կապված տվյալ հարցի վերաբերյալ։ Մենք կապ ենք հաստատել նրանց հետ, և նրանք ասում են, որ կիրականացնեն աշխատանքները, բայց հստակ ժամկետներ չեն նշում։ Կարող եմ ասել, որ մենք պետք է փոխարինենք քաղաքը ջրամատակարարող հին խողովակները։ Այս գործընթացը շարունակվում է և ներկայումս գտնվում է նախագծման փուլում։ Ինչպես Նինոծմինդայում փոխարինվեցին բոլոր գծերը, նմանատիպ աշխատանքներ կարող են սկսվել նաև Ախալքալաքում», — ասաց Ախալքալաքի քաղաքապետարանի ենթակառուցվածքների, ճարտարապետության և տարածական պլանավորման ծառայության պետ Արա Մովսիսյանը։
«Եթե մենք թույլտվություններ ենք տալիս այս աշխատանքների համար, ապա պետք է ունենանք դրանք վերահսկելու և պատժամիջոցներ կիրառելու մեխանիզմներ: Մենք խնդրում ենք ձեզ ավելի մեծ ուշադրություն դարձնել այս հարցին (խմբ.՝ ասֆալտե ծածկույթի հեռացմանը և դրան հաջորդող վերականգնմանը)», — նշել է Սակրեբուլոյի պատգամավոր Արմեն Մառանգոզյանը:
Դրանից հետո պատգամավորները նաև հետաքրքրվեցին Ախալքալաքի փողոցներում ճանապարհային գծանշումների տեղադրման վերաբերյալ: Քաղաքապետարանի ներկայացուցիչները նշեցին, որ գործում է անցյալ տարի կնքված համաձայնագիրը, որի համաձայն՝ գծանշումները պետք է տեղադրվեին աշնանը: Սա առաջացրեց պատգամավորների դժգոհությունը, ովքեր նշեցին, որ ուշ աշնանից և ձմռանից հետո գծանշումներից գործնականում ոչինչ չի մնում: Նրանք կարծում էին, որ ավելի տրամաբանական կլինի նման աշխատանքներ իրականացնել գարնանը կամ ամռանը, երբ քաղաք են ժամանում արտասահմանից շատ այցելուներ, և երթևեկն ավելի աշխույժ է: Ի պատասխան՝ քաղաքապետարանի աշխատակիցները խոստացան փորձել ճանապարհային գծանշումները տեղափոխել աշնանից ավելի վաղ ժամկետ:
