Այսօր՝ օգոստոսի 1-ին, Ախալքալաքի Հայկական երիտասարդական կենտրոնում տեղի ունեցավ «Ջավախք 2026» ճամբարի փակման արարողությունը։ Ավելի քան 140 դպրոցական տարիքի երեխաներ հավաքված ծնողներին, կենտրոնի աշխատակիցներին և հյուրերին ներկայացրեցին ճամբարի վեց օրերի ընթացքում սովորած երգերն ու պարերը։ Ինչպես միշտ, ճամբարն ավարտվեց երեխաների և նրանց հետ շփվելու նպատակով օվկիանոսը հատած խմբապետների հետ տխուր հրաժեշտով։
Ճամբարի վեց օրերը լի էին երեխաների միմյանց և իրենց խմբապետների՝ աշխարհի տարբեր ծայրերից եկած երիտասարդների հետ շփումով։ Այս օրերը լի էին հայոց պատմության, մշակույթի և ավանդույթների մասին նոր և թարմացվող գիտելիքներով, ինչպես նաև սպորտային միջոցառումներով։
Ճամբարի ծրագիրը ներառում էր պատմության դասախոսություններ, քննադատական մտածողության զարգացմանը ուղղված վարժություններ, հայկական երգի և պարի դասեր, վարպետաց դասեր, սպորտային միջոցառումներ և թիմային խաղեր։ Բոլոր մասնակիցները բաժանված էին երեք տարիքային խմբերի, ինչը թույլ է տալիս միջոցառումները հարմարեցնել երեխաների տարիքին։
Ճամբարային օրերն անցնում էին հայրենասիրական ոգով։
Փակման արարողության ժամանակ երեխաները կատարեցին հայրենասիրական պարեր և երգեր՝ ցուցադրելով իրենց հմտություններն ու գիտելիքները: Երիտասարդական կենտրոնի սաները նաև ուրախացրին իրենց ծնողներին, հյուրերին, Երիտասարդական կենտրոնի աշխատակիցներին և հատուկ հյուրերին՝ Հայ օգնության միության ներկայացուցիչներին Հայաստանից և Կանադայից՝ վրացական պարերով:
Երիտասարդական կենտրոնի պատասխանատու Կարինե Թադևոսյանը շնորհակալություն հայտնեց և խոսեց ճամբարի կարևորության մասին։ Նա նշեց, որ այս տարի ճամբար է այցելել ավելի քան 140 երեխա։ Չնայած ճամբարը նախատեսված էր զգալիորեն ավելի քիչ երեխաների համար, նրանք կարողացան ոչ մեկին չմերժել, քանի որ ճամբարը ոչ միայն հանգստի և արտադասարանական կրթության վայր է, այլև մի վայր, որը կապում է երեխաներին հայրենիքի և միմյանց հետ։
Ճամբարն անցկացրեցին ԱՄՆ-ից, Կանադայից և այլ երկրներից ժամանած ութ խմբապետնր՝ Երիտասարդական կենտրոնի 15 օգնականների՝ ներկա և նախկին ճամբարականների օգնությամբ։ Երիտասարդական կենտրոնի ղեկավարությունը հատուկ շնորհակալություն հայտնեց ինչպես արտասահմանից եկած խմբապետներին, այնպես էլ նրանց օգնականներին։ Նրանց Հայ օգնության միության անունից շնորհվեցին շնորհակալագրեր։ Խմբապետների համար օրվա անակնկալը հուշանվերներ էին, որոնք հատուկ նրանց հանար պատրաստել էին օգնականները։
Վերջում, ինչպես լինում է վերջին 14 տարիների ընթացքում ճամբարի փակման արարողության ժամանակ, երեխաները չէին կարողանում բաժանվել իրենց խմբապետներից և օգնականներից՝ նոր ընկերներից, որոնց հետ մտերմացել էին վերջին վեց օրերի ընթացքում։
«Ջավախք» ճամբարն անցկացվում է արդեն 14-րդ անգամ։ Նախագիծն իրականացվում է Հայ օգնության միության ծրագրի շրջանակներում և ԱՄՆ-ի արևելյան ափի հայ սփյուռքի երիտասարդ անդամների նախաձեռնությունն է: Ամեն տարի կամավորներն ինքնուրույն միջոցներ են հավաքում ճամբարի համար, այցելում Ջավախք և աշխատում երեխաների հետ։
Այսօր ճամբարն ավարտվեց նաև Ախալցիխեում, որտեղ աշխատում էր խմբապետների մեկ այլ խումբ: Հաջորդ օրը նույն երկու խմբերը կսկսեն ճամբարները Նինոծմինդայում և Ծալկայում:
