Վերջին շաբաթվա ընթացքում Ախալքալաքի մունիցիպալիտետում բնակիչների վրա շների հարձակումների աճ է գրանցվել։
Հուլիսի 23-ին, ժամը 17:00-ի սահմաններում, 11-ամյա Պարույրը կրկնուսույցի հետ մասնավոր դասից հետո հեծանիվով տուն էր վերադառնում։ Դարբինյան փողոցում, հյուրանոցի մոտ, նրա վրա հարձակվել են երկու մեծ շներ։ Նրանք պատռել են նրա տաբատը և կծել ոտքը։ Քանի որ տղան, չնայած վախին, կանգ չի առել և շարունակել է հեծանիվը վարել, նա հաջողել է ավելի լուրջ վնասվածքներից խուսափել։ Հարձակման հետևանքով երեխան թեթև կծոց է ստացել, կապտուկներ և ուժեղ սթրես։ Հիվանդանոցում նրան պատվաստել են կատաղության դեմ։
Ախալքալաքի հանրային առողջության կենտրոնի տվյալներով՝ միայն վերջին շաբաթվա ընթացքում գրանցվել է շների կողմից կծոցներով հարձակման յոթ դեպք։ Երկու դեպքում հարձակումները կատարել է նույն շունը, մյուս դեպքերում՝ տարբեր կենդանիներ։
Միջադեպերը գրանցվել են Աղմաշենեբելի փողոցում, նախկին թիվ 1 զինվորական ավանում և Ախալքալաքի այլ փողոցներում, ինչպես նաև Ալաստան և Տուրցխ գյուղերում։
Հիշեցնենք, որ նույնիսկ կենդանիների հետ վարվելու նոր կանոնակարգերի ընդունումից հետո, տեղի բնակիչների կարծիքով, անօթևան շների խնդիրը մնում է չլուծված։ Չնայած դրան՝ ո՛չ տեղական ինքնակառավարման մարմինը, ո՛չ էլ կենտրոնական իշխանությունները դեռևս չեն կարողացել իրավիճակը վերահսկողության տակ վերցնել, և բնակիչների վրա հարձակումների թիվը, ինչպես ցույց են տալիս վերջին դեպքերը, շարունակում է աճել։
Հանրային առողջության կենտրոնի (ՀԱԿ) տվյալներով՝ Ախալքալաքի մունիցիպալիտետում այս տարվա հունվարի 1-ից ի վեր գրանցվել է կենդանիների կծոցների 79 դեպք։ Դրանցից 76-ը շան կծոցներ են եղել, և մեկական՝ կատվի, գերմանամկան և խոզի կծոցներ։
