Jnews-ը բազմիցս անդրադարձել է Ախալքալաքում հետիոտների կողմից պարբերաբար բախվող խնդիրներին, ինչպես նաև օրենքների և կանոնակարգերի խախտման համար պատժամիջոցների բացակայությանը: Վերջերս տեղական ինքնակառավարման մարմինները սկսել են ուշադրոիթյուն դարձնել այս խնդիրներին։

Ախալքալաքում հետիոտները ստիպված են քայլել ճանապարհով, ինչը վրդովմունք է առաջացնում վարորդների մոտ: Սա պայմանավորված չէ հարմարավետությամբ, այլ մայթերից լիարժեք օգտվելու անհնարինությամբ. դրանք հաճախ փակվում են կայանված մեքենաներով, շինանյութերով կամ աղբով, իսկ որոշ տեղերում դրանք ընդհանրապես բացակայում են։

Որոշ բնակիչներ հարմարվել են դրա հետ, իսկ մյուսները բողոքներ են ներկայացնում պատկան մարմիններին կամ լրատվամիջոցներին։
Անցյալ շաբաթ տեղական ինքնակառավարման մարմինների սոցիալական ցանցերի էջերում հայտնվեց տեղեկատվություն Ախալքալաքի սակրեբուլոյի պատգամավորների կողմից քաղաքապետարանի վերահսկողության ծառայության ներկայացուցիչների հետ աշխատանքային հանդիպում անցկացնելու մասին: Սոցիալական ցանցերում տեղադրված համառոտ տեղեկատվության հիման վրա հանդիպման ժամանակ քննարկվել են բնակիչների համար հարմարավետ քաղաքով տեղաշարժման համար տրանսպորտի, ինչպես նաև այլ բարեկարգման հարցեր։

Քննարկման հիմնական թեմաներն էին քաղաքային բարեկարգումները, հասարակական կարգի պահպանումը և բնակիչների հարցումներին ու բողոքներին արձագանքման արդյունավետության բարձրացումը։ Մասնավորապես, նրանք անդրադարձան մայթերին և հասարակական վայրերում շինանյութերի, ավազի, խճաքարի և այլ իրերի տեղադրմանը, որոնք խոչընդոտում են հետիոտների տեղաշարժը։

Քննարկվեց նաև երկար ժամանակով կայանված և չօգտագործվող տրանսպորտային միջոցների վիճակը, որոնք զբաղեցնում են հասարակական տարածքները և անհարմարություններ ստեղծում բնակիչների համար։
Հատուկ ուշադրություն դարձվեց քաղաքացիների բողոքներին՝ հարսանիքների և այլ միջոցառումների ժամանակ մինչև ուշ երեկո տևող բարձր երաժշտության և աղմուկի վերաբերյալ։ Հանդիպման մասնակիցները ընդգծեցին գործող կանոնակարգերի պահպանման և բնակիչների խաղաղության ու լռության իրավունքը հարգելու անհրաժեշտությունը։

Քաղաքի շատ մասերում մայթերի բացակայությունը, մայթերին կայանատեղիները, աղմուկի վերահսկումը և փողոցներում շինանյութերի տեղադրումը՝ այս հարցերը մնում են արդիական մի քանի տարի շարունակ։ Դրանք բազմիցս քննարկվել են Ախալքալաքի սակրեբուլոյի նիստերում։ Սակայն դեռևս չեն ներկայացվել որևէ կոնկրետ լուծումներ, որոնք քաղաքը հարմարավետ կդարձնեն ոչ միայն վարորդների, այլև հետիոտների համար։

«Մեզ գրել են, որ խնդրում են քաղաքում լինեն մայթեր և հետիոտների համար դրանք ազատ լինեն։ Եվ մենք, իհարկե, արձագանքում ենք մեր բնակիչների մեկնաբանություններին։ Մենք դեռ աշխատում ենք այս ուղղությամբ և որևէ կոնկրետ արդյունքներ չունենք», — Jnews-ի հետ հանդիպման ժամանակ մեկնաբանեց Ախալքալաքի մունիցիպալիտետի սակրեբուլոյի նախագահ Ռուբեն Պալյանը։

Ախալքալաքի մունիցիպալիտետի սակրեբուլոյի փոխնախագահ Նաիրի Իրիցյանը նշեց, որ առկա խնդիրներն ակնհայտ են ինչպես բնակիչների, այնպես էլ պատգամավորների համար։ Նա հավելեց, որ քանի որ վերահսկողության ծառայությունը պատասխանատու է այս կանոնակարգերի կիրառման համար,պատգամավորներն որոշել են ուսումնասիրել ծառայության անարդյունավետ աշխատանքի պատճառները։

«Մենք՝ և՛ բնակիչները, և՛ ես, զբոսնում ենք քաղաքում և տեսնում ենք մեր առջև ծառացած խնդիրները։ Մենք տեսել ենք խնդիրները, և լուծումներ կգտնվեն՝ դա կլինի քաղաքապետարանի հետ համատեղ աշխատելու արդյունքում։ Մենք, իհարկե, տեսնում ենք խնդիրը, բայց այն մեկ օրում լուծելն աներևակայելի դժվար է։ Բայց մենք հասկացանք, որ ծառայությունը չունի մարդկային ռեսուրսներ՝ շինարարության նման խնդիրները կառավարելու համար, երբ շինանյութերն ամենուր են», — ասում է Նաիրի Իրիցյանը։

Չնայած քննարկմանը շոշափվել է հարցերի լայն շրջանակ, հանդիպումից հետո դրանց իրականացման որևէ կոնկրետ միջոցառումներ կամ ժամկետ չի հայտարարվել, ինչպես Jnews-ի հետ զրույցում հայտնել են Ռուբեն Պալյանը և Նաիրի Իրիցյանը։