Հունիսի 24-ին Ախալքալաքի Սակրեբուլոյի նիստում պատգամավորները կրկին բարձրացրել են հասարակական տրանսպորտի գործարկման հարցը։ Չնայած այն հանգամանքին, որ ավտոբուսների ձեռքբերումից անցել է մի քանի ամիս, քաղաքապետարանի ներկայացուցիչները դեռևս չեն ներկայացրել դրանց գործարկման հստակ ժամկետներ։
Հասարակական տրանսպորտի թեման պարբերաբար բարձրացվում է Սակրեբուլոյի նիստերում։ «Վրացական երազանք» կուսակցության պատգամավոր Արմեն Մառանգոզյանը հետաքրքրվել է վերջին ամիսներին տեղի ունեցած փոփոխությունների մասին։
«Դեկտեմբերին տեղի ունեցած քննարկումից անցել է վեցից յոթ ամիս։ Եվ կրկին որևէ նորություն չկա։ Գուցե ինչ-որ նորություններ կա՞ն», — հարցրել է նա։
Ախալքալաքի Սակրեբուլոյի տնտեսական զարգացման վարչության պետ Մնացական Փամբուխչյանը խոստովանել է, որ խնդիրը մնում է չլուծված։ Նա որպես ուշացման պատճառներից մեկը նշել է էլեկտրոնային վճարային սարքավորումների բացակայությունը։
«Երկու բանկ կարող էին տեղադրել վճարային սարքեր, բայց նրանք հրաժարվեցին։ Մերժման պատճառն այն էր, որ մունիցիպալ աշխատակիցների մեծ մասն օգտվում է ուրիշ բանկից և չի ստանում իրենցից աշխատավարձ։ Եվ դրանից հետո մենք առաջարկ ստացանք Մունիցիպալ զարգացման հիմնադրամից՝ ավելի շատ ավտոբուսներ գնելու համար։ Մենք մեր կառավարությանը հայտ ներկայացրեցինք՝ մեզ համար յոթ ավտոբուս գնելու համար, որից հետո, կարծում եմ, այս հարցն ավելի հիմնավոր կերպով կլուծվի։ Մենք կունենանք ավտոբուսների պարկ, որը կերթևեկի ամբողջ մունիցիպալիտետով։ Այնպես որ, մենք պարզապես մի փոքր պետք է սպասենք», — պատասխանեց Ախալքալաքի քաղաքապետարանի տնտեսական զարգացման վարչության պետ Մնացական Փամբուխչյանը։
Սակայն քաղաքապետարանի ներկայացուցիչները հստակ պատասխան չեն տվել այն մասին, թե որքան պետք կլինի սպասել կամ ինչ կլինի արդեն գնված երկու ավտոբուսների հետ։
Հասարակական տրանսպորտի նախագիծը շարունակում է ուշացումների բախվել, չնայած ավտոբուսների ձեռքբերման և մատակարարման ավարտին։ Սկզբնապես նախատեսված էր մեկնարկել հունվարին, սակայն Ախալքալաքի մունիցիպալիտետում հասարակական տրանսպորտը դեռևս չի սկսել գործել։
Վերջին վեց ամիսների ընթացքում այս հարցը բազմիցս քննարկվել է Սակրեբուլոյի նիստերում։ Հիմնական խոչընդոտը, ինչպես պարզվել է, ոչ թե ավտոբուսների ձեռքբերումն է, այլ քաղաքապետարանի կողմից դրանք շահագործելու պատրաստակամության բացակայությունը։ Տրանսպորտի կազմակերպման հարցերը մնում են չլուծված, երթուղիները հաստատված չեն, վճարումների կատարման համակարգ չի ներդրվել, և գործընթացը կառավարելու համար առանձին կազմակերպություն կամ ծառայություն չի ստեղծվել։ Ավելին, մունիցիպալ բյուջեից գումար չի հատկացվել ավտոբուսների պահպանման և շահագործման համար։
Դրա հետ մեկտեղ, հասարակական տրանսպորտը շարունակում է մնալ հրատապ խնդիր մունիցիպալիտետի բնակիչների, հատկապես գյուղաբնակ բնակիչների համար, ովքեր տարիներ շարունակ տրանսպորտային դժվարությունների են բախվել։
Այժմ քաղաքապետարանը հույս ունի ոչ միայն լուծել առկա կազմակերպչական խնդիրները, այլև ընդլայնել ավտոբուսային պարկը՝ ձեռք բերելով ևս յոթ ավտոբուս։ Սակայն, կանոնավոր ուղևորափոխադրումների մեկնարկի հստակ ժամկետներ դեռևս չեն անվանվում։
