Ամեն տարի գարնան սկզբին Ախալքալաքի բնակիչները հարցնում են. ե՞րբ է տեղական ինքնակառավարման մարմինը լուծելու ձմռանն առաջացած փոսերի խնդիրը։ Հաջորդիվ ծագում է մեկ այլ հարց. արդյո՞ք այս տարի կանցկացվեն ճանապարհային գծանշումները։
Ամեն տարի ճանապարհների վերանորոգումը սկսվում է միայն այն ժամանակ, երբ վարորդների համբերությունը սպառվում է քանդված ճանապարհներով վարելուց՝ մանևրելով փոսերի միջով և ամեն անգամ բողոքելով, երբ իրենց մեքենաներն աղմուկով ընկնում են հերթական փոսի մեջ։ Այս պայմաններում խոսել այն մասին, որ ճանապարհային գծանշումներն օգնում են վարորդներին պահպանել երթևեկության կանոնները, թվում է անտեղի։ Այնուամենայնիվ, Jnews-ն ամեն տարի բարձրացնում է այս կարևոր հարցը։
Բանն այն է, որ ճանապարհային գծանշումները ոչ միայն քաղաքի բարեկարգման և արտաքին տեսքի հարց են, ինչպես շատերը կարծում են, այլև հետիոտների և վարորդների անվտանգության հարց։ Դիտարկումները ցույց են տալիս, որ ճանապարհային գծանշումների հայտնվելուց հետո հետիոտների նկատմամբ երթևեկության կանոնների խախտումների թիվը նվազում է։
Օրինակ՝ անցյալ տարի ոստիկանությունը սկսեց հիշեցնել բնակիչներին ճանապարհը անցնելու կանոնների մասին: Որոշ հետիոտների զգուշացրեցին և կոչ արեցին օգտվել միայն հետիոտնային անցումներից, իսկ ոմանց տուգանեցին 50 լարիով ճանապարհը սխալ տեղով հատելու համար։
Անցյալ ամռանը Վրաստանի «Ճանապարհային երթևեկության մասին» օրենքը խախտելու համար տուգանքները բարձրացվեցին: Փոփոխությունների համաձայն՝ հետիոտները, որոնք չեն հետևում լուսացույցերին, ճանապարհային նշաններին կամ ճանապարհային գծանշումներին, կտուգանվեն 50 լարիով՝ նախկին 10 լարիի փոխարեն: Կրկնակի խախտման համար տուգանքը կկազմի 100 լարի: Նույն խախտումը, որը կատարվել է մայրուղում, միջազգային ճանապարհին կամ ներքին նշանակության ճանապարհին, կհանգեցնի 100 լարի տուգանքի: Մեկ տարվա ընթացքում կրկնակի խախտման համար տուգանքը կբարձրանա մինչև 200 լարի։
Ախալքալաքի փողոցները բաժանված են երկու կատեգորիաների. որոշները գտնվում են տեղական ինքնակառավարման մարմինների իրավասության ներքո, իսկ մյուսները՝ Ճանապարհների դեպարտամենտի իրավասության ներքո և ունեն ազգային նշանակություն: Ճանապարհների երկու կատեգորիաներն էլ սպասարկվում են «Ջավախ Ավտո Գզա» ընկերության կողմից:
Ազգային ճանապարհների սպասարկումն իրականացնում է մի ընկերություն, որը շահում է բազմամյա մրցույթը: Ջավախքում այս աշխատանքներն իրականացնում է «Ջավախ Ավտո Գզան»: Ազգային ճանապարհի մի հատվածն Աղմաշենեբելի փողոցն է, որը վերանորոգվել է 2019-2020 թվականներին: Վերանորոգման ավարտից հետո ճանապարհը պետք է գծանշվեր և ճանապարհային հայելիներ տեղադրվեին: Սակայն գծանշումներն առաջին անգամ կատարվել են միայն 2023 թվականի հունիսի 28-ին՝ Ճանապարհների դեպարտամենտ ներկայացված բազմաթիվ բողոքներից հետո: Քաղաքի հենց այս հատվածում էին ամենից հաճախ տեղի ունենում ճանապարհատրանսպորտային պատահարներ և հետիոտների վրաերթեր:
Քաղաքում հետիոտնային անցումները, որոնք նույնպես անցկացվել են «Ջավախ Ավտո Գզայի» կողմից մրցույթի շրջանակներում, մասամբ կատարվել են 2023 թվականին: Այդ ժամանակ գծանշումները կատարվել են Ջավախեթի, Դարբինյան և Աղմաշենեբելի փողոցներում՝ մինչև քաղաքային հիվանդանոց:
Սակայն քաղաքի կենտրոնական մասում՝ Ազատության փողոցում, ինչպես նաև Խաս Բախչա զբոսայգու մոտ, գծանշումները կատարվել էին 2019 թվականին և մի քանի ամսվա ընթացքում ջնջվել էին։ 2020 թվականին գծանշումներ հայտնվեցին Ազատության և Ջավախիշվիլի փողոցների խաչմերուկում։
2025 թվականի հունիսի 10-ին հետիոտնային անցումները վերականգնվեցին Ախալքալաքի գլխավոր փողոցում և Խաս Բախչա զբոսայգու մոտ։ Գծանշումներ ավելացվեցին նաև Աղմաշենեբելի փողոցի սկզբում, որտեղ հաճախակի են լինում վթարներ և հետիոտնային վրաերթեր, այդ թվում՝ մահացու ելքով։
Ձմռան ընթացքում ճանապարհներին ոչ միայն նոր փոսեր են առաջացել, այլև գործնականում ջնջվել են ճանապարհային գծանշումները։ Սակայն, ինչպես մեզ տեղեկացրին Ախալքալաքի քաղաքապետարանից, փոսերի և խոռների վերանորոգման հարցը, որի գործընթացն արդեն սկսվել է, դեռևս չի լուծվել, ուստի դեռ վաղ է խոսել նոր գծանշումների անցկացման մասին։
«Առայժմ ամենակարևորը փոսերի վերանորոգման աշխատանքները հաջողությամբ ավարտելն է։ Տեսնենք, թե ինչպես կընթանան գործերը, իսկ հետո կմտածենք ճանապարհային գծանշումների մասին», — պատասխանեց Ախալքալաքի քաղաքապետարանի ենթակառուցվածքների, ճարտարապետության և տարածական պլանավորման ծառայության պետ Արա Մովսիսյանը։
