Մայիսի 31-ին Թբիլիսիի պատմական Մեյդանի հրապարակում տեղի ունեցավ Սայաթ-Նովային նվիրված ավանդական Վարդատոնը, որը տարիներ շարունակ համախմբում է հայ համայնքի ներկայացուցիչներին, մշակույթի գործիչներին և բազմաթիվ հյուրերի՝ մեծարելու հայ մեծ աշուղի հիշատակը։ Տոնական միջոցառումը կազմակերպվել էր Վիրահայոց թեմի և մշակութային կառույցների նախաձեռնությամբ։
Ավանդույթի համաձայն՝ օրվա ընթացքում մասնակիցները հարգանքի տուրք մատուցեցին Սայաթ-Նովայի հիշատակին՝ ծաղիկներ խոնարհելով նրա շիրիմին, որից հետո տոնակատարությունը շարունակվեց Մեյդանի հրապարակում՝ մշակութային գեղեցիկ ծրագրով և համերգով։ Մինչ տոնակատարության սկիզբը, հավարտ Սուրբ և Անմահ պատարագի, եկեղեցու բակում հանգչող Սայաթ-Նովայի գերեզմանի մոտ կատարվեց հոգեհանգստյան կարգ:
Վարդատոնը ոչ միայն հիշատակի օր է, այլև հնարավորություն՝ նոր սերնդին ներկայացնելու Սայաթ-Նովայի ստեղծագործական ժառանգությունն ու նրա բացառիկ ներդրումը հայ, վրաց և տարածաշրջանային մշակույթների զարգացման գործում։
Տոնական համերգային ծրագրի ընթացքում ելույթ ունեցան Թբիլիսիի և Ջավախքի տարբեր ստեղծագործական խմբեր ու անհատ կատարողներ։
Մեյդանի հրապարակը ժամեր շարունակ լցված էր երաժշտությամբ, պարով ու տոնական տրամադրությամբ։ Տարբեր սերունդների ներկայացուցիչները միասին նշեցին Սայաթ-Նովայի հիշատակի օրը՝ վերահաստատելով, որ Վարդատոնը շարունակում է մնալ Թբիլիսիի հայկական կյանքի կարևորագույն մշակութային իրադարձություններից մեկը։
Հիշեցնենք, որ վերջին տարիներին հանդիսությունն իրականացվում է «Վիրահայերի միության», Թբիլիսիի քաղաքապետարանի, Հայաստանի և Վրաստանի մշակույթի նախարարությունների համակզամակերպմամբ և Թբիլիսիի Պետրոս Ադամյանի անվան պետական հայկական դրամատիկական թատրոնի, Վրաստանում Հայաստանի դեսպանության և Հայ Առաքելական Սուրբ Եկեղեցու Վիրահայոց թեմի աջակցությամբ:
