Ընթանում են ասֆալտապատման աշխատանքներ Ախալքալաքի շրջանի Արագվա գյուղից մինչև Կոթելիա տանող ճանապարհը 6,68 կմ երկարությամբ:
Հունիսի 15-ից սկսվել են ճանապարհաշինական աշխատանքները Արագվայից Կոթելիա ճանապարհահատվածում, որտեղ նախատեսվում է մինչև տարեվերջ ասֆալտապատել 6.68 կմ ճանապարհ։
ՍՊԸ «Ա.Ա.Բ», որը շահել է աշխատանքները անցկացնելու տենդերը, հայկական կազմակերպություն է գրանցված Վրաստանում, այն արդեն 5 տարի է ինչ վրացական շուկայում է աշխատում։
Տենդերը հայտարարվել է 4 500 000 լարիով, սակայն ընկերությունը այն շահել է 4 000 000 լարիով։
«Աշխատանքները ընթանում են ճանապարհի ամբողջ երկայնքով, այժմ հողային շերտի հեռացումը և ճանապարհի լայնացման աշխատանքները արդեն վերջացրել ենք», – ասաց ասֆալտապատման աշխատանքների պատասխանատու Վահե Մարգարյանը։
Ճանապարհը, որ ուներ 6 մետր լայնություն, նորոգումից հետո կլինի 10 մետր, լինելու են մայթեր և 4 կանգառ, որոնցից երկուսը Կոթելիայում, մեկը Զագի խաչմերուկում և ևս մեկը Արագվայում, ճանապարհաշինական ծրագրում ներառված է նաև Արագվա գյուղի կամուրջի վերանորոգումը։
Աշխատանքների համար տրված է 15 ամիս ժամկետ, սակայն ընկերությունը խոստանում է աշխատանքները ժամկետից շուտ վերջացնել՝ մինչև ձմեռ։
«Մարդկային ուժ, որպես բանվոր չի լինելու, բոլոր աշխատանքները կատարելու է տեխնիկան։ Տեղի տեխնիկաները աշխատեցնում են տեղացիները, իսկ այն տեխնիկան, որը բերում ենք Հայաստանից, աշխատեցնում են մեր աշխատակիցները», - ասաց Վահե Մարգարյանը։
Ճանապարհաշինական աշխատանքի բնույթը ընկերության նախատեսված նախնական տարբերակից փոփոխվել է։
«Ըստ կազմակերպության պլանավորածի ասֆալտը պետք է լիներ 1 շերտ 5 սմ հաստությամբ, բայց դա մեր եղանակային պայմաններին չի համապատասխանում հետևաբար կանենք այնպես, ինչպես Ախալքալաքում՝ այսինքն 2 շերտ ասֆալտապատում 4-սմ հաստությամբ», – մեզ հետ զրույցում ասաց Ախալքալաքի Շրջանային Վարչության ենթակառուցվածքային ծառայությունների, տարածքային ձևավորման, շինարարության և ճարտարապետության բաժնի ղեկավար Ալբերտ Նահատակյանը։
Ջուլիետա Տոնականյան
