Այսօրվանից՝ ապրիլի 17-ից ներառյալ ամսի 21-ը, Վրաստանում ուժի մեջ է մտել թեթև մարդատար ավտոմեքենաների տեղաշարժի արգելքը: Ավտոմեքենայով տեղաշարժը չի արգելվում միայն որոշ դեպքերում:
Ախալքալաքցիները հիշել են իրենց հեծանիվների գոյության մասին, որոնք երկար ժամանակ ավտոտնակներում էին, քանի որ մոտոցիկլետ, մոպեդ և հեծանիվ վարելը չի արգելվել:
Թեթև մարդատար ավտոմեքենաների տեղաշարժի արգելքը. Ո՞ւմ է թույլատրվում տեղաշարժվել
Ախալքալաքում և արվարձաններում ժամը 12:00-ից հետո մեքենաները հազվադեպ են նկատվում:
Փողոցներում հիմնականում երթևեկում են ոստիկանական մեքենաները, ինչ-որ ապրանքներ տեղափոխող բեռնատարները:
Առավոտյան ոստիկանությունը նախազգուշացրել էր բնակիչներին տուն գնալ մինչև ժամը 12:00-ն, քանի որ դրանից հետո արգելվում է տեղաշարժվել մեքենաներով:
Շատ քիչ մեքենաներ, որոնք մնացել էին փողոցներում 12:00-ից հետո, հեռացան պարեկային ոստիկանության ուղեկցությամբ: Նրանց նախազգուշացվեց, որ եթե երկրորդ անգամ տեսնեն նրանց, ապա կտուգանեն:
Ախալքալաքում այս սահմանափակման խախտման տուգանման դեպքերը մեզ համար դեռ անհայտ են:
Բրատիսլավ Իգիթխանյան
