Նալբանդյան փողոցը կրկին վերածվել է առևտրային կենտրոնի: Գյուղատնտեսական մթերքներին փոխարինել են գրենական պիտույքները: Տեղական իշխանությունները վստահեցնում են, որ սա ժամանակավոր է, իրենք ընդառաջել են առևտրականներին:
Նոր ուսումնական տարվան ընդառաջ Նալբանդյան փողոցում կրկին հայտնվել են առևտրական սեղաններ, որտեղ գրենական պիտույքներ են վաճառում:
Քաղաքապետ Յուրիկ Ունանյանը մեզ տված հարցազրույցում նշեց, որ փողոցային առևտուրը ընդհանրապես կարգելվի, իսկ փողոցում առկա առևտրական սեղանների վերաբերյալ ասաց.
«Դպրոցներին ընդառաջ 7 առևտրականներ մեզ դիմեցին խնդրանքով, որ ժամանակավոր թույլ տանք նրանց առևտուր անել Նալբանդյան փողոցում, մենք էլ ընդառաջելով նրանց թույլատրեցինք, որպեսզի օգոստոսի 20-ից մինչև սեպտեմբերի 20-ը վաճառեն»,- ասաց Ախալքալաքի քաղաքապետը։
Առևտրականները գոհ են: Նրանք դիմել են քաղաքապետարան և ստացել թույլտվություն։
«Գոհ ենք, դիմել ենք քաղաքապետարան թույլ են տվել մի ամիս կանգնել, հետո չենք կանգնի»,- ասաց գերնական պիտույքներ վաճառող մի երիտասարդ:
Բնակիչների շրջանում շշուկներ են տարածվում, որ Նալբանդյան փողոցում մասսայական առևտուրը կրկին կվերսկսվի Նոր տարվա նախաշեմին։ Այդ փաստը չժխտեց նաև քաղաքապետը։
«Հնարավոր է թույլ տանք մի 15 օրով, եթե շուկան շատ ծանրաբեռնված լինի, դա էլ ի օգուտ ժողովրդի, սակայն էլի ժամանակավոր»,- ասաց Յուրիկ Ունանյանը:
Քաղաքապետը նշեց, որ այս ամենն արվում է հանուն առևտրականների և գնորդների հարմարավետության, որպեսզի ապրանքի գները արհեսատականորեն չթանկանա, իսկ առևտրականները կկատարեն իրենց Ամանորի առևտուրը։
Գայանե Ակոջյան
