![](https://jnews.ge/wp-content/uploads/valuta.jpg)
Ախալքալաքի թիվ 1 և թիվ 2 մանկապարտեզները կհիմնանորոգվեն։ Արդեն տևական ժամանակ է ընթանում է թիվ 2 մանկապարտեզի վերակառուցման աշխատանքները, իսկ թիվ 1-ի աշխատանքները դեռ չեն սկսվել։
Ախալքալաքի թիվ 1 և թիվ 2 մանկապարտեզների վերակառուցման աշխատանքների էլեկտրոնային մրցույթը հայտարարել է «Մունիցիպալ զարգացման հիմնադրամը», որը հաղթել է ՍՊԸ “Մեդմշեն” ընկերությունը՝ 7 522 000 լարիով։ Իսկ պրեսկուրանտի մոտավոր արժեքը՝ 1 830 175․19 լարի է։
ՍՊԸ “Մեդմշեն” ընկերության ներկայացուցիչ, աշխատանքների վերահսկիչ Անզոր Քափիանիձեն ասաց, որ աշխատանքներն ընթանում են իրենց հունով, խնդիրներ ընթացքում չեն առաջանում։
«Հիմա ապամոնտաժման աշխատանքներ են տարվում, կատարել ենք առաստաղի, պատերի և հատակի ապամոնտաժումը, մաքրվել են պատերը, ինչպես նաև հատակը։ Հիմա աշխատում ենք պատերի և հիմքի ամրացնելու վրա։ Զուգահեռ դրսի տարածքն ենք մաքրում։ Կատարել ենք պատերի հորատման (ծակում, փորում) աշխատանքները։ Կլինի ժամանակակից չափանիշներին համապատասխան մանկապարտեզ։ Աշխատանքները կավարտենք մոտ մեկ տարի հետո», – ասաց Անզորի Քափիանիձեն, ՍՊԸ “Մեդմշեն” ընկերության ներկայացուցիչը։
Նախակրթարանի վերակառուցման աշխատանքներում ներգրավված են 7-8 տեղացի աշխատողներ։
Թիվ 1 մանկապարտեզի վերակառուցումը նույնպես այս ընկերությունն է իրականացնելու, սակայն այնտեղ դեռ աշխատանքներ չեն տարվում։