Հունվարի 19-ին Ախալքալաքում Վրաց ուղղափառ եկեղեցին մատուցեց Սուրբ պատարագ ջրօրհնեքի կապակցությամբ, այնուհետև, ավանդույթի համաձայն, Խոսպիո գյուղում կատարվեց կնունքի արարողություն։
Հավատացյալները գետի ափի մի փոքր հատված նախօրոք մաքրեցին և պատրաստեցին արարողության համար։
Ամեն տարի հունվարի 19-ին, Խոսպիո գյուղի Սուրբ Գիորգի եկեղեցում տեղի է ունենում մկրտություն, որից հետո արարողությունը շարունակվում է գետի ափին, որտեղ և նախապես օրհնած ջրում մկրտում են կնքվողին։
Վրաց ուղղափառ եկեղեցում մկրտվողը կարող է մի քանի քավոր ունենալ։
«Երկուսից երեք քավոր ընդունելի է, իսկ չորս կամ հինգ շատ է։ Այսօր երեխային մկրտելուց հետո օրհնված ջուր են մտնում նայև մյուս հավատացյալները։ Մարդիկ նպատակ են պահում և ջուրը մտնում, այսօր ջուրը ընդհանրապես սառը չէ և ես ամեն տարի մտնում եմ ու երբեք չեմ հիվանդացել, այլ հակառակը՝ բուժիչ հատկություն ունի»,- ասաց ավագ երեց Ալեքսանդրը։
Այսօրվա կնքվողը փոքրիկ Լուկան էր, ով խիզախաբար մտավ ջուրը, նրա օրինակին հետևեցին նաև մեծահասակները։ Օրհնված ջուրը կարող են մտնել միայն կնքվածները։
15 տարեկան Զաքռոն ամենահամարձակներից էր և մեր բոլոր հարցերին կարճ ու կտրուկ պատասխանելով ասաց՝ «Առաջին անգամ չեմ մտնում ջուրը, ոչ մի անգամ էլ չեմ մրսել»։
Ջուլիետա Տոնականյան
