---

Ապրիլ ամսից սկսած Նինոծմինդայի շրջանում կաթ արտադրողները վերամշակողներին են հանձնում իջեցված գներով։ Կաթը գյուղացուց մթերվում է 1,20 լարիով, նախկին 1,80-ի փոխարեն։

Նինոծմինդայի մունիցիպալիտետի Ղաուրմա գյուղի բնակիչները դժգոհում են․ «Կես լիտր հանքային ջուրն արժե 1,50 լարի, իսկ 1 լիտր կաթն արժե 1,20 լարի։ Ժողովուրդն իր չարչարանքի դիմաց կարելի է ասել կաթը ձրի է տալիս։ Ղեկավարությունն ընդհանրապես չի մտածում թե ինչով պետք է ապրի ժողովուրդը»:

Ընդգծենք, որ Նինոծմինդայի շրջանում մարդկանց եկամտի հիմնական աղբյուրը հենց անասնապահությունն է։ Բայց կաթ արտադրողները չեն կարողանում իրենց արտադրանքը ձեռնտու գնով վաճառել։

NOR ռադիոկայանի տվյալներով Նինոծմինդայի շրջանի գյուղերում կաթի մթերման գնային պատկերն այսպիսին է.

• Սաթխայում կաթի գինը 1,20 լարի է,
• Հեշտիայի գյուղական համայնքում կաթի գինը 1,20 լարի է,
• Փարվանայում կաթի գինը 1,20 լարի է,
• Փոկա գյուղում կաթի գինը 1,20 լարի է,
• Գոնդուրայի համայնքում կաթի գինը 1,20 լարի է,
• Մեծ Արագյալ գյուղում կաթի գինը 1,40 լարի է,
• Ջիգրաշեն գյուղում կաթի գինը 1,20 լարի է,
• Փոքր Խանչալիում կաթի գինը 1,20 լարի է,
• Մեծ Խանչալի գյուղում կաթի գինը 1,20 լարի է,
• Գորելովկայի գյուղական համայնքում կաթի գինը 1,40 լարի է։

Հիշեցնենք, որ ապրիլի 3-ին Նինոծմինդայի մունիցիպալիտետի Գորելովկայի գյուղական համայնքի 5 գյուղերի (Օրլովկա, Եֆրեմովկա, Սպասովկա, Սամեբա, Ժդանով) բնակիչներ հավաքվել էին Գորելովկա գյուղի կենտրոնում և բողոքում էին կաթի գների նվազման դեմ: Թորիա գյուղի բնակիչները նույնպես կաթը մի քանի օր չեն վաճառել, պահանջելով գների բարձրացում: Չնայած բողոքի ակցիաներին կաթի գինն այդպես էլ չբարձրացավ: