Հունիսի 13-ին, Թբիլիսիի Շոթա Ռուսթավելիի անվան պետական ակադեմիական թատրոնում տեղի է ունեցել Հայաստանի Հանրապետության և Վրաստանի միջև դիվանագիտական հարաբերությունների հաստատման 30-ամյակին նվիրված ընդունելություն և համերգ՝ Հայաստանի պարի պետական անսամբլի կատարմամբ։
Վրաստանում Հայաստանի դեսպանության փոխանցմամբ՝ ներկա են եղել Վրաստանի կառավարության և պետական այլ գերատեսչությունների ներկայացուցիչներ, խորհրդարանի պատգամավորներ, Վրաստանում հավատարմագրված դեսպաններ, դիվանագիտական կորպուսի և միջազգային կազմակերպությունների ներկայացուցիչներ, հայ և վրացի հասարակական-մշակութային գործիչներ, Վրաստանի հայ համայնքի անդամներ, այլ հյուրեր։
Երկկողմ դիվանագիտական հարաբերությունների հաստատման 30-ամյակի կապակցությամբ հյուրերին ուղղված ելույթներով հանդես են եկել Վրաստանում ՀՀ արտակարգ և լիազոր դեսպան Ռուբեն Սադոյանը և Վրաստանի արտաքին գործերի նախարարի առաջին տեղակալ Լաշա Դարսալիան։
Շնորհավորելով ներկաներին Հայաստանի և Վրաստանի միջև դիվանագիտական հարաբերությունների հաստատման հոբելյանական տարեդարձի կապակցությամբ՝ դեսպան Ռուբեն Սադոյանը խոսել է երկու ժողովուրդներին դարերի ընթացքում միավորող բազմաթիվ կապերի և արժեհամակարգային ընդհանրությունների մասին՝ ընդգծելով, որ այս ամուր հիմքի վրա ձևավորված Հայաստանի և Վրաստանի միջև միջպետական հարաբերությունները հետևողականորեն շարունակում են զարգանալ՝ արձանագրելով նոր դինամիկա, նոր տրամադրություն և նոր հեռանկարներ։
Իր հերթին Լաշա Դարսալիան կարևորել է բարձր և բարձրագույն մակարդակում փոխադարձ այցելությունների պարբերականությունը, որն արտացոլում է երկու պետությունների միջև առկա փոխվստահությունը, բարեկամությունն ու կարևոր օրակարգը՝ հույս հայտնելով, որ Հայաստանի և Վրաստանի միջև համագործակցությունը օրինակելի կդառնա տարածաշրջանի համար։
