Վրաստանի խորհրդարանը վերջնական որոշում է ընդունել ենթակառուցվածքների և տարածաշրջանային զարգացման նախարարությունները մեկ գերատեսչության մեջ միավորելու մասին պատրաստված օրինագծի վերաբերյալ։ Այս երկու գերատեսչությունների միավորումից բացի, վերացվել է նաև իրավապահ մարմինների գործունեության համակարգման հարցերով պետական նախարարի պաշտոնը։
Կառավարության կողմից խորհրդարան ներկայացված օրինագիծը քննարկվել է արագացված կարգով և երրորդ ընթերցմամբ ընդունվել 83 կողմ և 1 դեմ ձայնով։
Նույն օրինագծի համաձայն՝ Կառավարության վարչակազմին է վերապահվել պետական լիազորների և մունիցիպալիտետների մարմինների հետ փոխգործակցության համակարգման և աջակցման գործառույթը։
Հիշեցնենք, որ կառավարության կառուցվածքում փոփոխությունների վերաբերյալ կառավարության ղեկավարն ավելի վաղ բոլորովին այլ նախաձեռնություններ և ծրագրեր ուներ։ Խորհրդարանի աշնանային նստաշրջանի մեկնարկին՝ Բյուրոյի առաջին նիստում, քննարկման էր ներկայացվել կառավարության օրինագիծ, որը նախատեսում էր Տարածաշրջանային զարգացման նախարարության վերացում և կառավարության կազմում տարածաշրջանային քաղաքականության հարցերով պետական նախարարի նոր պաշտոնի ստեղծում։
Ինչպես հայտնի է, տարածաշրջանային քաղաքականության հարցերով պետական նախարարի պաշտոնը պետք է զբաղեցներ Մամուկա Մդինարաձեն։ Մդինարաձեն լքել է կառավարությունը և հայտարարել է նաև քաղաքականությունից հեռանալու մասին, որից հետո կառավարությունը հետ է կանչել խորհրդարան ներկայացված օրինագիծը։
