Վրաստանի ազգային բանկը 2019 թվականից ի վեր առաջին անգամ սկսել է դոլար գնել՝ ազգային արժույթի լարիի կտրուկ ամրապնդման ֆոնին։
Մինչ այս բանկը դոլար էր վաճառում, որպեսզի լարին չընկնի, սակայն մարտ ամսից վրացական արժույթն արժևորվել է 15,7%-ով։
Երեքշաբթի օրը ազգային բանկը աճուրդով գնել է 10 մլն դոլար։
Չորեքշաբթի օրը դոլարի նկատմամբ լարիի պաշտոնական փոխարժեքը կազմում է 2,8668 լարի/$1։
2009 թվականի մայիսից լարիի փոխարժեքը ԱՄՆ դոլարի նկատմամբ սահմանվել է Bloomberg առևտրային համակարգի միջբանկային շուկայում գործարքների ագրեգացիայի միջոցով։ 2021 թվականի փետրվարի 1-ից վրացական արժույթի շուկան ամբողջությամբ անցել է Bloomberg-ի Bmatch համակարգին։
TBC CAPITAL վերլուծական խումբը վերջերս զգուշացրել էր «լարիի չափազանց ուժեղացման» նշանների մասին։
Դրա վրա ազդել է արտարժույթի ներհոսքը երկիր միգրանտների ու զբոսաշրջիկների հաշվին, ինչպես նաև արտերկրից դրամական փոխանցումների կտրուկ աճը։
Այս ֆոնին արտաքին հաշվեկշռի ցուցանիշները բարելավվում են, զբաղվածությունն աճել է, գնաճը՝ դանդաղել։
Գնաճը մեծ խնդիր է, և լարիի հետագա ամրապնդումն այս առումով միայն ողջունելի է։ Թեև TBC Capital-ը կարծում է, որ հաշվի առնելով դոլարի ամուր դիրքերը միջազգային շուկաներում, համեմատաբար հավանական է ավելի չեզոք հեռանկար:
Վրաստանի ազգային արժույթը սկսեց արագորեն ամրապնդվել մարտի 10-ից։ Մինչ այս լարիի անկումը կասեցնելու համար, որը ամսվա սկզբին հասել էր 3,4 լարի/դոլարի, Վրաստանի Ազգային բանկը ստիպված էր աճուրդով վաճառել 39,57 մլն դոլար։
