Ախալքալաք քաղաքի տարբեր ուղղություններով սպասարկումն իրականացվում է դժվարությամբ: Այս անգամ Jnews-ը շրջեց քաղաքի Աղմաշենեբելի փողոցի 200 մետրանոց հատվածով՝ ֆիքսելով 3 ճանապարհային նշան, որոնք կա՛մ փոխարինման, կա՛մ վերանորոգման կարիք ունեն։ Պատասխանատու «ՋավախԱվտոԳզա» ընկերությունը լռում է:
Այսպիսով, քաղաքի Աղմաշենեբելիի փողոցն է: «Երթևեկությունն ուղիղ կամ դեպի ձախ» թելադրող նշանի մոտ, ըստ երեւույթին, վրաերթ է տեղի ունեցել, այն գտնվում է կիսատապալված վիճակում և ոչ ոք չի պատրաստվում դա ուղղել։
Աղմաշենեբելի և Երևանյան փողոցների խաչմերուկի մոտ
Եվս մեկ թելադրող նշանը՝ «Երթևեկությունն ուղիղ կամ դեպի աջ», տեղադրված է պատշաճ կերպով՝ ամուր, բայց սխալ: Հաշվի առնելով այն հանգամանքը, որ թելադրող նշանները տեղադրվում են ճանապարհի երթևեկելի մասերի հատման վայրերում, ապա ստացվում է, որ այս նշանը սխալ է տեղադրված։ Այն կարող է շփոթեցնել վարորդին, քանի որ կանգնած է Երևանյան փողոցի հետ հատման վայրում, որն այս դեպքում ոչ թե աջ, այլ ձախ կողմում է գտնվում։ Կամ նշանը փակցված է հետևի մասում, կամ այն ընդհանրապես չպետք է այդտեղ լինի: Երկու դեպքում էլ ակներև է քաղաքի նկատմամբ անփույթ վերաբերմունքի փաստը։
Մի փոքր իջնելով ներքև՝ հանդիպում ենք «նեղացած» նախազգուշացնող «Արհեստական անհարթություն» նշանին։ Անհարթության մասին նշումը վաղուց անհետացել է ճանապարհային նշանից և կապույտ ֆոնի վրա մնացել է միայն մերկ, սպիտակ եռանկյունին: Իսկ վերջերս ճանապարհային նշանը, ասես վիրավորվել է և «երես է թեքել» փողոցին։
Նշաններն այս վիճակում վաղուց են գտնվում, և օրեցօր ավելանում են թերությունները՝ դրանք վերացնելու փոխարեն։
Այսպիսի արհամարհական վերաբերմունք Ախալքալաքում կարելի է նկատել տարբեր վայրերում և տարբեր բաների կամ առարկաների նկատմամբ։
«ՋավախԱվտոԳզա» ընկերությունը պատասխանատու է Ախալքալաքի ավտոճանապարհների, այդ թվում՝ Աղմաշենեբելի փողոցի, ինչպես նաև ճանապարհային նշանների սպասարկման համար։ Առավոտվանից ընկերությունը մեր հեռախոսազանգերին չի պատասխանում։ Թե ինչո՞ւ են նշանները նման վիճակում, մեզ չհաջողվեց պարզել։
