Այսօր Ախալքալաքի շրջանի Խուլգումո գյուղի բնակիչները բողոքի ցույց են կազմակերպել քաղաքապետարանի մոտ՝ բողոքելով գյուղամեջով անցնող կենտրոնական ճանապարհի սարսափելի վիճակի համար։
Մոտ 50 երիտասարդ հավաքվել էր Ախալքալաքի քաղաքապետարանի դիմաց:
«Անցած անգամ կուլիկիամցիների հետ էլ էինք եկել, բայց ապարդյուն: Մենք ուզում ենք պատասխան ստանալ, թե երբ կլուծվի գյուղի ճանապարհի հարցը, ընտրություններից ընտտրություն խոստումներ են տալիս»,- Jnews-ի հետ զրույցում ասաց Խուլգումոյի բնակիչ Խաչիկ Մանվելյանը:
Քաղաքապետարանում ցուցարարներին ասացին, որ քաղաքապետը տեղում չէ՝ ժողովի է, մոտ կես ժամ քաղաքապետարանի դիմաց սպասելուց հետո ցուցարարները բարձրացան 2-րդ հարկ դահլիճի դիմաց: Որոշ ժամանակ սպասելուց հետո հեռացան այդպես էլ չհանդիպելուվ քաղաքապետ Մելքոն Մակարյանին։
Գյուղացիները բազմիցս բողոքել են տեղական իշխանություններին՝ ճանապարհների վիճակից, խնդիրն առ այսօր լուծում չի ստացել:
Հարկ է նշել, որ Խուլգումո-Կուլիկամ գյուղերի ասֆալտապատման նախագիծը պատրաստ է, ըստ որի 2 կմ 413 մ ճանապարհի կառուցման համար անհրաժեշտ է 2 167 760 լարի։ Միջոցներ լինելու դեպքում 2022 թվականին այն կիրագործվի։
Վարդուհի Կուրղինյան
