Վրաստանում երկու մարդ է ձերբակալվել COVID-19-ի PCR կեղծ բացասական թեստեր վաճառելու համար: Այս մասին հայտնում է Ֆինանսների նախարարության քննչական ծառայությունը:
«Մեղադրյալը Իմերեթի տարածաշրջանում գտնվող բուժհաստատության անունից, առանց համապատասխան լաբորատոր փորձաքննության, գումարի դիմաց կորոնավիրուսի բացասական PCR թեստեր է պատրաստել և փոխանցել շահագրգիռ անձանց», – ասվում է գերատեսչության տարածած հաղորդագրության մեջ:
Քննչական միջոցառումների արդյունքում իրավապահ մարմինների աշխատակիցները առգրավել են համակարգչային տեխնիկան, որն օգտագործվել է կեղծ վկայականներ պատրաստելու համար:
Ինչպես նշվում է, հանցագործության մեջ ներգրավված այլ անձանց բացահայտելու ուղղությամբ շարունակվում են համապատասխան քննչական միջոցառումները:
Հետաքննություն է սկսվել Վրաստանի Քրեական օրենսգրքի 362-րդ հոդվածի 1-ին և 221-րդ հոդվածի 4-րդ մասերով, ինչը նախատեսում է 4-ից 6 տարի ազատազրկում:
