Առողջապահության համաշխարհային կազմակերպության ղեկավար Թեդրոս Հեբրեյեսուսը հայտարարել է, որ շատ կարևոր է ստուգել, թե արդյո՞ք Ուհանի լաբորատորիան առնչություն ունի պանդեմիայի սկսվելու հետ և կոչ է արել Չինաստանին բաց համագործացության։ Նա հավելել է, որ ամբողջական տեղեկատվությունը թույլ կտա բացառել այդ վարկածը, գրում է ՌԲԿ-ն` AP-ին հղումով։
Նա ասել է, որ դեռևս վաղաժամ է բացառել այն վարկածը, որ SARS-CoV-2 կորոնավիրուսը, որն առաջացնում է Covid-19 հիվանդությունը, առաջացել է չինական Ուհանի լաբորատորիայում և տարածվել է արտահոսքի պատճառով։
«Ես ինքս լաբորանտ եմ եղել, ես իմունոլոգ եմ, աշխատել եմ լաբորատորիայում և գիտեմ, որ միջադեպեր պատահում են։ Այդպես լինում է», – ասել է ԱՀԿ ղեկավարը։
Հեբրեյեսուսն ընդգծել է, որ շատ կարևոր է ստուգել, թե ինչ է տեղի ունեցել՝ հասկանալու համար, արդյո՞ք ինչ-որ կապ կա պանդեմիայի և լաբորատորիայի միջև։
2021-ի սկզբին ԱՀԿ հատուկ հանձնաժողովն այցելել է Ուհանի լաբորատորիա։ Արդեն փետրվարի սկզբին հրապարակվեցին նախնական արդյունքները՝ բացառելով վիրուսի ստեղծումը լաբորատորիայում։ Վերջնական զեկույցը հրապարակվեց մարտին, որտեղ նույնպես ասվում էր, որ լաբորատորիայում միջադեպի հետևանքով վիրուսի տարածման վարկածը «ծայրահեղ անհավանական է»։
