Թբիլիսիում նշվող ամենամյա փառատոնը` նվիրված հայ բանաստեղծ-աշուղ Սայաթ-Նովային, այս տարի անց կացվեց առանց համերգի:

Մայիսի վերջին շաբաթն ամեն տարի Թբիլիսիում նշվում է «Վարդատոնը»: Այդ օրը Թբիլիսիի հին թաղամասում` Մեյդանում, Գորգասալիի հրապարակում, ամեն տարի Սայաթ-Նովայի պատվին մեծ համերգ էր անցկացվում:

Այս տարի, սակայն, կորոնավիրուսի պատճառով տոնն այլ կերպ ընթացավ:

Վրաստանի հայ համայնքը երթը սկսել է Հովհաննես Թումանյանի տուն֊թանգարանից դեպի Սուրբ Գևորգ եկեղեցի, որտեղ թաղված է մեծ բանաստեղծ և երգիչ Սայաթ-Նովան: Նրա շիրիմին կարմիր վարդեր են խոնարհել:

Ավանդաբար ամեն տարի Թբիլիսիում մայիսի վերջին կիրակին նշվում է որպես Սայաթ-Նովայի հիշատակի օր` «Վարդատոն» անվանումով: Այն առաջին անգամ տոնել են 1914 թվականին Թբիլիսիում՝ հայ մեծ գրող Հովհաննես Թումանյանի, գեղանկարիչ Գևորգ Բաշինջաղյանի և վրացի բանաստեղծ, գրականագետ Իոսեբ Գրիշաշվիլու նախաձեռնությամբ։ Այդ օրը Սուրբ Գևորգ եկեղեցու բակում տոնի մասնակիցները կարմիր վարդեր են դնում Սայաթ-Նովայի շիրիմին, լսում նրա ստեղծագործությունները։