Ախալքալաքի Հանրային առողջապահության կենտրոնում (ՀԱԿ) այսուհետ կարող են անվճար ՊՇՌ և հակագենի թեստեր հանձնել տաքսու վարորդները, շուկայի և տոնավաճառի աշխատողները, ինչպես նաև եկեղեցու աշխատակիցները:
Ախալքալաքի ՀԱԿ-ի աշխատակիցներն ամեն օր անվճար թեստեր են անցկացնում որոշ հաստատությունների աշխատակիցներին: Այժմ, ոստիկանության, հրշեջների, ուսուցիչների, անվտանգության աշխատակիցների և մունիցիպալիտետի գյուղերի բուժանձնակազմի հետ միասին, 12 օրը մեկ կարող են թեստ հանձնել տոնավաճառի, շուկայի աշխատողները, տաքսու վարորդները և եկեղեցու աշխատակիցները:
Մարդկանց ընդունում են օրվա առաջին կեսին, PCR-թեստի պատասխանները կարելի է ստանալ երկու օրվա ընթացքում, իսկ հակագենի թեստի արդյունքները՝ 20-30 րոպեում:
Ըստ ՀԱԿ-ի տնօրեն Ավետիք Տոնականյանի, ավելացված կոնտինգենտից ոչ ոք դեռ չի թեստավորվել: Նրա կարծիքով, մունիցիպալիտետում կորոնավիրուսի հետ կապված իրավիճակը բարելավվում է:
«Վիճակագրությունը ցույց է տալիս, որ իրավիճակը դեպի լավն է գնում: Այսօր կատարված 33 թեստերից ոչ մեկը դրական չի եղել: Բարելավումը կարելի է բացատրել նրանով, որ շատերը տանը հիվանդացել են և ոչ մի տեղ չեն դիմել », – ասում է ՀԱԿ-ի տնօրեն Ավետիք Տոնականյանը:
Համավարակի սկզբից ի վեր, Ախալքալաքի ՀԱԿ- ն անցկացրել է 2800 PCR և 577 հակագենի թեստ:
Ավետիք Տոնականյանի խոսքով, եթե մարդը հիվանդացել է կորոնավիրուսով, ամենայն հավանականությամբ, 6 ամիս անց նույն անձը կարող է նորից հիվանդանալ:
Վրաստանում դեռևս գրանցվել է կորոնավիրուսի նոր շտամով վարակման միայն մեկ դեպք:
