Ենթակառուցվածքային աշխատանքները հիմնականում իրականացվել են, մշակութային կյանքը ժամանակավորապես կանգ է առել: Ախալքալաքի մունիցիպալիտետի քաղաքապետ Յուրիկ Ունանյանը խոսում է այն մասին, թե ինչպիսին էր անցնող տարին:
Ախալքալաքի մունիցիպալիտետի քաղաքապետ Յուրիկ Ունանյանը, ամփոփելով անցնող տարին, ասում է, որ գոհ է քաղաքապետարանի աշխատանքից և կարծում է, որ նրանք կատարել են իրենց առջև դրված պարտականությունների 99% -ը:
«Մինչև հունիս մենք ոչինչ չենք արել, նկատի ունեմ ենթակառուցվածքային աշխատանքները: Հունիսին նոր սկսեցինք, և այսօրվա դրությամբ մենք կատարել ենք մեր առջև դրված ենթակառուցվածքային խնդիրները: Մենք չկարողացանք միայն մեկ աշխատանք կատարել, որի համար 5 անգամ տենդեր էր հայտարարվել, բայց ոչ ոք չէր մասնակցում: Մնացած աշխատանքները Տարածաշրջանային հիմնադրամից, տեղական բյուջեից, ամեն ինչ արված է, ինչպես նաև «Օգնություն գյուղին» ծրագրի աշխատանքները », – ասում է նա:
Այս տարի Ախալքալաքի մունիցիպալիտետում 6 ենթակառուցվածքային աշխատանքներ ֆինանսավորվել են Տարածաշրջանային հիմնադրամի կողմից: Դրանք են Վաչիան-Հոկամ, Բարալեթ-Էխտիլա, Բավրա-Կարտիկամ, Արագվա-Բուղաշեն, Սուլդա-Խավեթ ճանապարհների, ինչպես նաև Ալաթուման-Բեժանո ճանապարհի ասֆալտապատումը, որի աշխատանքները սկսվել էին աշնանը և կշարունակվեն հաջորդ տարի:
Այս բոլոր աշխատանքների արժեքը կազմում է շուրջ 5 միլիոն լարի:
Ձեռքբերումներից քաղաքապետն առանձնացնում այն է, որ այս տարի Վարևան և Խորենիա գյուղերում վերջապես կառուցվեց խմելու ջրի գիծ:
Գումբուրդո և Գոգաշեն գյուղերում սկսել են և հաջորդ տարի կավարտեն մանկապարտեզների կառուցումը:
2020 թվականին Ախալքալաքի մունիցիպալիտետում տեղական բյուջեից իրականացվել է 35 նախագիծ:
«Օգնություն գյուղին» ծրագրի շրջանակներում մունիցիպալիտետում իրականացվել է 79 աշխատանք, որից 76-ն արդեն ավարտվել են, իսկ մնացած երեք աշխատանքների համար` մարզագույքի ձեռքբերման համար, տենդերն արդեն կայացել է:
2020 թվականին Ախալքալաքի մունիցիպալիտետում վերանորոգվել է 24 դպրոց, այնտեղ հիմնականում կառուցվել են սանհանգույցներ:
Կորոնավիրուսի համավարակի պատճառով մունիցիպալիտետում այս տարի մշակութային և սպորտային կյանքը, որն առանց այդ էլ աչքի չէր ընկնում իր ակտիվությամբ, կանգ է առել: Գյուղերում մի քանի մինի ֆուտբոլի մրցումներ են անցկացվել, և կարատեիստները մասնակցել են առցանց մրցումների:
