Ճանապարհի վերականգնումը, որը շարունակվում է արդեն 2 տարի, կավարտվի օգոստոսի վերջին: Ներկայումս ասֆալտապատված է Ջիգրաշենից մինչև Նինոծմինդա ճանապարհի հատվածը:
Այս պահին Ջիգրաշեն գյուղի մոտ ընթանում են ասֆալտապատման աշխատանքներ: Ասֆալտապատմանը զուգահեռ իրականացվում են նաև խճապատման և հարթեցման աշխատանքներ:
Ըստ «ՋավախԱվտոԳզա» ընկերության ներկայացուցչի, այս պահին 4-5 բրիգադ տարբեր աշխատանքներ են կատարում: Ախալքալաք քաղաքից մինչև Ջիգրաշեն գյուղ տանող ճանապարհն արդեն ասֆալտապատված է:
Ընկերության ներկայացուցչի խոսքերով, Ախալքալաք քաղաքից ճանապարհի մոտ 14 կմ-ն արդեն ասֆալտապատված է, մնացել է մոտ 4-5 կմ: Աշխատանքները կավարտվեն այս ամսվա վերջ:
Հիշեցնենք, որ ընդհանուր առմամբ կվերականգնվի Ախալցիխե-Նինոծմինդա ավտոճանապարհի՝ 70 կմ-ից մինչև 86 կմ-ի 16 կմ ճանապարհահատվածը, այսինքն` Ախալքալաք քաղաքից մինչև Նինոծմինդա քաղաք ընկած հատվածը:
Վերականգնման պայմանագիրը ստորագրվել է 2019 թվականի հուլիսի 10-ին:
Վերանորոգման տենդերը հայտարարվել էր Վրաստանի տարածքային զարգացման և ենթակառուցվածքների նախարարության ճանապարհների դեպարտամենտի կողմից՝ 2019 թվականի ապրիլի 18-ին՝ 19 038 910 լարիի չափով: Տենդերը շահել էր «Ճանապարհաշինության N1 վարչություն»-ը՝ 14 749 992.92 լարիով: Իսկ վերակառուցումն իրականացնում է «Ջավախ Ավտո Գզա» ճանապարհաշինարարական ընկերությունը, որը «Ճանապարհաշինության N1 վարչություն» ենթակապալառուն է:
Բրատիսլավ Իգիթխանյան