Վրաստանի խորհրդարանի խոսնակ Արչիլ Թալակվաձեն մեկնաբանել է «The Heritage Foundation» հիմնադրամի հետազոտող Լյուկ Քոֆիի նախաձեռնությունը, որն առաջարկել էր Վրաստանում՝ Ախալքալաքի նախկին ռուսական ռազմակայանում, տեղադրել Սիրիայից դուրս բերված ամերիկյան զորախմբը:
Ըստ Թալակվաձեի, ամերիկյան իշխանությունների ներկայացուցիչների հետ աշխատանքային հանդիպումների ժամանակ չի քննարկվել Ախալքալաքում ամերիկյան զորախումբը տեղակայելու առաջարկը:
«Սա փորձագետի կարծիքն է, և, հավանաբար, վրացի փորձագետները պետք է պատասխանեն դրան: Վրացական իշխանությունները մշտական կապի և աշխատանքային հաղորդակցման մեջ են ԱՄՆ կառավարության և Կոնգրեսի հետ: Այս ձևաչափում տեղի է ունենում մեր երկրի համար ռազմավարական հարցերի քննարկումը: Նման հարց աշխատանքային ձևաչափերում չի բարձրացվել », – ասել է Թալակվաձեն:
«The Heritage Foundation» ֊ի հետազոտող Լյուկ Քոֆին առաջարկում է Սիրիայից դուրս բերված ամերիկյան զորախումբը տեղակայել Վրաստանում, մասնավորապես Ախալքալաքում՝ նախկին ռուսական ռազմակայանում, «Իսլամական պետության» ամրության վերականգնման դեպքում արագ արձագանքելու համար:
Վրաստանի հանրապետական կուսակցությունը վրացական իշխանություններին կոչ է արել ուշադրության արժանացնել այս նախաձեռնությունը և այն մշակել արդեն պաշտոնական ձևաչափով: