Չարենցի փողոցի բնակիչները դիմել են Jnews.ge-ի խմբագրությանը, նրանք բողոքում են, որ ոմանք աղբը չեն լցնում աղբարկղերի մեջ, այլ թափում են դրանց մոտակայքում:
Աղբարկղի կողքին թափված աղբը քամու միջոցով տարածվում է ամբողջ փողոցով մեկ, դրա հետ մեկտեղ ամենուրեք տարածվում է գարշահոտը: Չարենցի փողոցի բնակիչները դժգոհում են, որ իրենց տներում հայտնվել են առնետներ, քանի որ փողոցը մշտապես աղբի մեջ է:
«Դա շատ վատ է, մարդիկ մաքրություն չեն պահպանում, դա անվայելուչ է», – ասում է Չարենցի փողոցի բնակիչը:
Իր հերթին, Ախալքալաքի Սպասարկման կենտրոնի տնօրենը հավաստիացնում է, որ աղբարկղերն աղբահանվում են ամեն օր:
«Մենք ամեն օր աղբահանում ենք աղբարկղերը, կենտրոնական փողոցներում օրական երկու անգամ ենք աղբահանում», – ասում է Սպասարկման կենտրոնի տնօրեն Արմեն Բիչախչյանը:
«Աղբարկղերում տեղ կա, բայց մարդիկ, չգիտես ինչու, աղբը նետում են աղբարկղի կողքը, այլ ոչ թե դրա մեջ», – ասում է Չարենցի փողոցի մեկ այլ բնակիչ:
Բրատիսլավ Իգիթխանյան