Հայ-վրացական սահմանին ժամեր տևած բողոքի ցույցը դադարեցվել է: Ցուցարարներին վաղը կընդունեն Հայաստանի կառավարությունում:

Վրաստանում Հայաստանի դեսպանությունից հայտնում են, որ դեսպանությունը ինտեսիվ կապի մեջ է Հայաստանի կառավարության և սահմանին բողոքի ակցիա անցկացնող Ջավախքի բնակիչների հետ: Բանակցությունների արդյունքում պայմանավորվածություն է ձեռք բերվել: Վաղը՝ դեկտեմբերի 15-ին Հայաստանի կառավարության անդամները կընդունեն ցուցարարների հինգ հոգուց բաղկացած պատվիրակությանը:

Հայ-վրացական սահմանը փակ է: Ջավախահայերը բողոքի ցույց են անում

«Մենք պայմանավորվածություն ունենք, որ վաղը 5 հոգանոց ցուցարարներից բաղկացած պատվիրակություն կգնանք Երևան և հանդիպում կունենանք Կառավարության անդամների հետ: Մենք ներկայացրել ենք խնդիրը, և բացատրեցինք իրավիճակը, որ արդեն բազմաթիվ մարդիկ կան, որոնց անձնագրերը վերցրել են և նրանք այս պահի դրությամբ Հայաստանից դուրս չեն կարող գալ: Մեզ դիմել են մոտավոր 10-15 հոգի, բայց մենք գիտենք որ այդ թիվը ավելի մեծ է, հազարների խնդիր է»- Jnews-ի հետ հեռախոսազրույցում ասաց ցուցարարներից:

Նշենք, որ ժամեր առաջ Ջավախքի բնակիչները փակել էին հայ-վրացական սահմանը: Նրանք հանդիպում էին պահանջում Հայաստանի կառավարության անդամներ հետ, որպեսզի լուծում տրվի ՀՀ երկքաղաքացիություն ստացած անձանց խնդիրներին, ովքեր այս պահին Հայաստանում հետախուզման մեջ են գտնվում: