Ոստիկանությունը կպաշտպանի բոլոր մարդկանց իրավունքները եւ կխափանի օրենքի բոլոր խախտումները: Այս մասին հայտարարել է Վրաստանի Ներքին գործերի նախարար Գիորգի Գախարիան Սամեգրելո-Զեմո Սվանեթի մունիցիպալիտետների քաղաքապետերի, Սակրեբուլոյի ներկայացուցիչների եւ Զուգդիդիի մեծամասնության պատգամավորների հետ հանդիպումից հետո:
Վրաստանի Ներքին գործերի նախարարի խոսքերով, Սամեգրելո ժամանման նպատակը տարածաշրջանի անվտանգության համատեքստում իրավիճակը վերանայելն է:
«Ինչպես գիտեք, Ներքին գործերի նախարարությունն ապահովում է խաղաղ եւ անվտանգ միջավայր ընտրությունների անցկացման համար: Առաջին փուլում մենք կարողացանք դա անել, եւ մենք կկարողանանք դա անել երկրորդ փուլում էլ: Իմ այցի նպատակն էր ամփոփել, թե ինչպես են անցկացվել ընտրությունները Սամեգրելոյում, թե ինչ պետք է անենք մեր քաղաքացիների անվտանգությունը բարձրացնելու համար՝ խաղաղ ընտրությունների անցկացման համատեքստում: Ես վերցրել եմ իմ վրա ամբողջ Վրաստանում հանդարտ ընտրությունների անցկացման հսկողությունը: Դա ինձ հանձնարարել է վարչապետը: Ոստիկանությունը կպաշտպանի բոլոր մարդկանց իրավունքները եւ կխափանի օրենքի բոլոր խախտումները», – ասել է Գիորգի Գախարիան:
Պատասխանելով լրագրողների այն հարցին, թե ի՞նչ համատեքստում է Գիորգի Գախարիան հիշատակել ընտրական անվտանգության հարցը, կապվա՞ծ է դա Սամեգրելոյի շրջանի հարեւանությամբ օկուպացված տարածքների հետ, ներքին գործերի նախարարը նշեց, որ Սամեգրելոյի ընտրությունները անվտանգ միջավայրում անցկացնելը հատկապես զգայուն է:
«Դուք գիտեք, որ մենք գտնվում ենք Զուգդիդիում: Այստեղից մի քանի կիլոմետր հեռավորության վրա՝ այն ժամանակավոր բաժանարար գիծ է, եւ դա լրացուցիչ ռիսկեր է ստեղծում: Այն այստեղ տալիս է լրացուցիչ զգայունություն՝ ապահով ընտրությունների անցկացման համար: Իհարկե, մենք հատուկ ուշադրություն ենք դարձնում դրա վրա», – հայտարարել է Գիորգի Գախարիան:
