Վրաստանում լրագրողներին և լրատվամիջոցների աշխատողներին համերաշխության համատեղ հայտարարություն են տարածում «Մամուլի միջազգային ինստիտուտի» (IPI) գլոբալ ցանցի անդամները և Կենտրոնական և Արևելյան Եվրոպայի IPI անկախ լրատվամիջոցների ցանցի անդամները:
«Մենք խստորեն դատապարտում ենք Վրաստանում բողոքի ընթացիկ ալիքի ընթացքում պետական անվտանգության ուժերի և անհատների կողմից նպատակաուղղված, դիտավորյալ և հաճախ դաժան հարձակումները լրագրողների վրա։ Բողոքի պատճառ է դարձել Վրաստանի կառավարության նոյեմբերի 28-ի որոշումը՝ Եվրամիության հետ բանակցային գործընթացը մինչև 2028 թվականի վերջը դադարեցնելու մասին։
Վրաստանում մամուլի ազատության և ժողովրդավարության համար նման մութ ժամանակներում մենք մեր լիակատար համերաշխությունն ենք հայտնում խիզախ լրագրողներին, ովքեր շարունակում են իրենց կենսական նշանակության աշխատանքը՝ հանրությանը իրազեկ պահելու նպատակով՝ չնայած անհասկանալի թշնամական և վտանգավոր միջավայրին: Նրանց աշխատանքը պարտադիր է ոչ միայն վրաց հասարակությանն ընթացիկ իրադարձությունների մասին իրազեկելու, այլեւ ողջ աշխարհի համար։
Լրագրողներին դաժան ծեծի են ենթարկել, բանավոր վիրավորանք են հասցրել, սպառնացել և բերման ենթարկել։ Առգրավել ու ոչնչացրել են նրանց տեխնիկան և անընդհատ միջամտել նրանց աշխատանքին։ Միևնույն ժամանակ շարունակվում է անկախ լրագրությունը նսեմացնելու արշավը…
Երկրում մամուլի ազատության դեմ այս աննախադեպ հարձակումները տեղի են ունենում ժողովրդավարական ազատությունների հետ մղմանը զուգահեռ: Վերջին մի քանի ամիսների ընթացքում լրատվամիջոցների միջավայրն էլ ավելի թշնամական և վտանգավոր է դարձել՝ քննադատական ձայները ճնշելու և սահմանափակելու համար օգտագործվող իրավական և ինստիտուցիոնալ գործիքներով», – ասվում է հայտարարության մեջ:
Ընդհանուր առմամբ, համատեղ հայտարարությունը ստորագրել են 78 առաջատար խմբագիրներ, լրագրողներ և ԶԼՄ-ների ներկայացուցիչներ։
