Վրացի օլիգարխ Բիձինա Իվանիշվիլին պանամական օֆշորային Limestone Finance International ընկերությանը պատկանող ընկերությունները վերագրանցել է որպես վրացական ԲԲԸ: Այդ մասին են վկայում նախորդ տարվա դեկտեմբերի 31-ի դրությամբ Պետական ռեգիստրի տվյալների մեջ արտացոլված փոփոխությունները, գրում է bizzone.info-ն։ Նրա կինը՝ Էկատերինե Խվեդելիձեն, Վրաստանում նոր ընկերություն է հիմնել՝ Lusol, հաղորդում է «Ազատություն» ռադիոկայանը՝ վկայակոչելով TV Pirveli-ին։
Limestone Finance International-ը Բիձինա Իվանիշվիլիի անունով գրանցված օֆշորային ընկերություններից է, որին պատկանում էր Վրաստանում գրանցված 7 ընկերություն։ 2024 թվականի վերջին Բիձինա Իվանիշվիլին վերագրանցել է իր բաժնետոմսերն այս բոլոր ընկերություններում Վրաստանում իրեն պատկանող ընկերությանը։ Խոսքը «Տերա» ՍՊԸ-ի մասին է, որը Վրաստանում գրանցված է 2020 թվականի դեկտեմբերի 24-ին։ Բիձինա Իվանիշվիլին գրանցված է որպես ընկերության 100% բաժնետոմսերի սեփականատեր։ 2024 թվականի դեկտեմբերի 31-ին «Տերա» ընկերությունը փոխել է կազմակերպաիրավական ձևը և ՍՊԸ-ից վերածվել բաժնետիրական ընկերության։ Ընկերությունը մնում է Իվանիշվիլիի սեփականության ներքո։ Ինչ վերաբերում է «Տերա» բաժնետիրական ընկերության վերահսկիչ խորհրդին, ապա դրա նախագահը Նատո Խաինդրավան է, իսկ անդամներն են Կախա Կոբիաշվիլին և Նոե Կինկլաձեն։
Բիձինա Իվանիշվիլին Վրաստանում 7 ընկերություն ուներ Պանամայում գրանցված Limestone Finance International SA օֆշորային ընկերության միջոցով։ Այս ընկերություններն են՝ «Նյու Կապիտալ» ՍՊԸ, «Սանապիրոս Խեդի» ՍՊԸ, «Քարթու Քոնսալթինգ» ՍՊԸ, «Աբասթումանի 2019» ՍՊԸ, «Գեոֆերտ» ՍՊԸ, «Բլեք Սի Արենա» ՍՊԸ, «Ինվեստ Կապիտալ» ՍՊԸ: Համաձայն 2025 թվականի հունվարի 17-ի ռեգիստրից քաղվածքի՝ այս ընկերությունները ներկայումս պատկանում են «Տերա» բաժնետիրական ընկերությանը։
2024 թվականի դեկտեմբերի 31-ին ռեգիստրում գրանցվել է նոր ընկերություն՝ «ATU Holding» բաժնետիրական ընկերությունը Բիձինա Իվանիշվիլիի որդու՝ Ուտա Իվանիշվիլիի անունով։
Հիշեցնենք, որ 2024 թվականի դեկտեմբերի 27-ին ԱՄՆ ֆինանսների նախարարությունը պատժամիջոցներ է կիրառել «Վրացական երազանքի» պատվավոր նախագահ Բիձինա Իվանիշվիլիի նկատմամբ։ Սահմանափակումները վերաբերում են բոլոր գործարքներին, որոնք վերաբերում են Իվանիշվիլիին պատկանող ցանկացած ընկերության՝ անկախ նրանից՝ նա ուղղակիորեն կամ անուղղակիորեն վերահսկում է այն, անհատապես, թե կոլեկտիվ կերպով՝ 50% կամ ավելի։ Բացի այդ, 2025 թվականի հունվարի 16-ին միջնորդություն է ներկայացվել նաև Միացյալ Թագավորության Համայնքների պալատ՝ Բիձինա Իվանիշվիլիի դեմ պատժամիջոցներ կիրառելու վերաբերյալ։
Իվանիշվիլիի կինը՝ Էկատերինե Խվեդելիձեն, հիմնել է նոր ընկերություն՝ «Lusol»-ը։ Ընկերության տնօրենը կլինի 37-ամյա Գելա Կոբերիձեն, ով դիմում է ներկայացրել պետական ռեգիստր՝ ընկերությունը գրանցելու համար։ Հարցին, թե ինչու է գրանցվել նոր ընկերությունը և որոնք են լինելու դրա գործառույթները, Կոբերիձեն դեռ չի պատասխանել։
Ընկերության հիմնական գործադիր մարմինը դիտորդական խորհուրդն է, որի անդամներն են՝ Նուգզար Դեկանոիձեն, Վեփխվիա Դվալին և Շոթա Կոբիաշվիլին։
Էկատերինե Խվեդելիձեի ներկայացուցիչը «Lusol» ԲԲԸ-ում Քարթու բանկի վերահսկիչ խորհրդի նախագահ Նատո Խաինդրավան է:
Նա նաև երևում է Բիձինա Իվանիշվիլիի որդու՝ Ուտայի նոր ընկերության համատեքստում, որը հիմնադրել է ATU Holding բաժնետիրական ընկերությունը Իվանիշվիլիի դեմ պատժամիջոցների սահմանումից չորս օր անց։
Երկու ընկերությունների հասցեն է՝ Թբիլիսի, Իլիա Ճավճավաձեի պողոտա 39դ, սա այն վայրն է, որտեղ գտնվում է «Cartu group»-ին պատկանող շենքը, այնտեղ է տեղակայված է Cartu Bank-ը։
