Զուրաբ Ազարաշվիլին հեռանում է Վրաստանի առողջապահության նախարարի պաշտոնից, — հայտնում է կառավարության վարչակազմը։ Նա համապատասխան որոշում է կայացրել վարչապետ Իրակլի Կոբախիձեի հետ հանդիպումից հետո։
Վրացական որոշ լրատվամիջոցներ ենթադրում են, որ Ազարաշվիլիի հրաժարականը կարող է կապված լինել Թբիլիսիի հանրապետական հիվանդանոցի շուրջ ստեղծված իրավիճակի հետ։ Հունվարին հայտարարվեց հիվանդանոցի հնացած շենքը քանդելու մասին, ինչին դեմ էին բուժհաստատության աշխատակիցները։
Փետրվարի 24-ին վարչապետ Կոբախիձեն բուժանձնակազմի հետ հանդիպումից հետո հայտարարեց, որ կառավարությունը դադարեցնում է Հանրապետական հիվանդանոցի հետ կապված գործընթացը։
Զուրաբ Ազարաշվիլին 2021 թվականի դեկտեմբերից գլխավորում է օկուպացված տարածքներից ներքին տեղահանվածների, աշխատանքի, առողջապահության և սոցիալական պաշտպանության նախարարությունը։
