Մրցակցության գործակալությունն ավարտին է հասցնում բժշկական ծառայությունների շուկայի ուսումնասիրությունը։ Մասնագետներն ուսումնասիրել են մոտ 170 ստացիոնար և ավելի քան 250 ամբուլատոր կլինիկաների տվյալները և ստուգել շուրջ 13 հազար տարբեր ծառայություն։

Գների աճ արձանագրվել է մոտ 3800 ծառայության դեպքում։ Մնացած ծառայությունների արժեքը կամ չի փոխվել, կամ նվազել է։

Հատկապես զգալի աճ է արձանագրվել 233 ծառայության դեպքում։ Դրանց արժեքն ավելի քան կրկնապատկվել է։

• 100-130%-ով՝ 70 ծառայություն,
• 130-160%-ով՝ 53 ծառայություն,
• ավելի քան 160%-ով՝ 110 ծառայություն։

Առայժմ չի հաղորդվում, թե կոնկրետ որ ծառայությունների և կլինիկաների մասին է խոսքը։ Այս տվյալները պետք է հրապարակվեն մոնիթորինգի ավարտից հետո։

Այժմ գործակալությունը պետք է պարզի, թե ինչի հետևանքով է տեղի ունեցել գների նման աճ։ Կլինիկաներից կպահանջվեն ծախսերի վերաբերյալ փաստաթղթեր՝ ծառայությունների արժեքը դրանց մատուցման իրական ինքնարժեքի հետ համեմատելու համար։

Մասնագետներն առանձին ուսումնասիրում են նաև, թե շուկայի ինչ մասնաբաժին ունեն խոշոր կլինիկաները և որքանով է ընդհանուր շուկան կախված դրանցից։ Եթե շուկայի զգալի մասը կենտրոնացած է մի քանի խոշոր ընկերությունների ձեռքում, նրանց միջև մրցակցությունը կարող է ավելի թույլ լինել, իսկ գների վրա ազդելու հնարավորությունները՝ ավելի մեծ։ Իսկ եթե շուկան բաշխված է մեծ թվով կլինիկաների միջև, մրցակցությունը սովորաբար ավելի ուժեղ է։

Նախնական տվյալներով՝ ընդհանուր առմամբ բժշկական շուկան չի թվում, թե խիստ կենտրոնացած է մի քանի ընկերությունների ձեռքում։ Սակայն դա չի նշանակում, որ գների հետ կապված խնդիրներ չկան։

Ուսումնասիրությունը հենց պետք է ցույց տա, թե ինչ է տեղի ունենում առանձին ուղղություններում։ Շուկայում գները միջինում կարող էին աճել 26%-ով, մինչդեռ առանձին բժշկական ծառայություններ կարող էին թանկանալ երկու-երեք անգամ։

Հետևաբար, այժմ ուշադրությունը կենտրոնանալու է հենց նման դեպքերի վրա՝ պարզելու, թե որ ծառայություններն են ամենաշատը թանկացել և ինչով կարող են կլինիկաները բացատրել գների նման աճը։