Այսօր՝ սեպտեմբերի 1-ին, Վրաստանում սկսվել է առաջին դասարանցիների համար նախատեսված դպրոցական համազգեստի վաճառքը։ Ախալքալաքում համազգեստը ձեռք են բերում թիվ 4 հանրային դպրոցում։
Ինչպես ավելի վաղ էր հայտարարվել, այսօր՝ ժամը 11:00-ից, Ախալքալաքի թիվ 4 հանրային դպրոցի մոտ հավաքվել էին առաջին դասարանցիներն ու նրանց ծնողները։ Երեխաներին և ծնողներին փոքր խմբերով ներս են թողնում հանդիսությունների դահլիճ։ Դպրոցի տնօրինության տեղեկությամբ՝ այնտեղ երկու տարածք է առանձնացված՝ դպրոցական համազգեստը դասավորելու և փորձելու համար։
Առաջին դասարանցիների համար նախատեսված դպրոցական համազգեստը հնարավոր կլինի ձեռք բերել սեպտեմբերի 1-ից 14-ը։ Ախալքալաքում գործընթացը կազմակերպված և հանգիստ անցկացնելու համար յուրաքանչյուր դպրոցին հատկացվել է առանձին օր։ Առաջին օրը համազգեստը ձեռք են բերել թիվ 2 հանրային դպրոցի առաջին դասարանցիները։ Այս տարի այս դպրոցն ունի ամենաշատ առաջին դասարանցիները։
Ծնողները հերթով մտել են տարածք և ձեռք բերել համազգեստը։ Ոմանք միանգամից գնել են երկու հավաքածու։ Մեկ ծնող կարող է առավելագույնը ձեռք բերել տղայի համար՝ երկու բաճկոն և չորս տաբատ, իսկ աղջկա համար՝ երկու բաճկոն, երկու տաբատ և երկու կիսաշրջազգեստ։
Յուրաքանչյուր երեխայի անունով գրանցվում է, թե համազգեստի ո՞ր բաղկացուցիչ մասերն են ձեռք բերվել և ի՞նչ քանակությամբ։ Համակարգում խիստ հաշվառում է իրականացվում։ Այդ պատճառով սահմանված քանակից ավելի համազգեստ ձեռք բերել հնարավոր չէ։ Պետական բոլոր դպրոցներում տարրական դասարանների աշակերտների համար դպրոցական համազգեստ կրելը պարտադիր կդառնա։ Համազգեստները վաճառվում են պիտակներով և առանձին փաթեթավորմամբ։ Ներկայացված են տարբեր չափսեր։
Jnews-ը հավաքված ծնողներից հետաքրքրվել է՝ գո՞հ են արդյոք դպրոցական համազգեստի որակից։ Ծնողները նշել են, որ գոհ են ինչպես որակից, այնպես էլ դպրոցական համազգեստի ներդրման գաղափարից։
«Եթե հնարավորություն լիներ համազգեստ ձեռք բերել նաև ավագ դասարանների աշակերտների համար, շատ լավ կլիներ։ Հիմա ստիպված ենք մտածել, թե ինչ հագցնենք նրանց դպրոց գնալու համար։ Նախ՝ դա մատչելի է և բոլորի համար նույնը։ Սա երեխաներին կպաշտպանի բուլինգից, քանի որ բոլորը նույն կերպ են հագնվելու։ Չի լինի այն տարբերությունը, թե ով է թանկ հագնված, իսկ ով է մարքեթփլեյսներից ավելի էժան հագուստ գնում», — ասել է առաջին դասարանցիներից մեկի մայրը։
Նշենք, որ աղջիկների և տղաների դպրոցական համազգեստները տարբերվում են գույնով։ Տղաների հավաքածուի մեջ ներառված են բաճկոն և երկու տաբատ, իսկ աղջիկների հավաքածուի մեջ՝ բաճկոն, կիսաշրջազգեստ և տաբատ։ Բաճկոնների վրա պատկերված է Վրաստանի զինանշանը։
Հիշեցնենք, որ առաջին դասարանցիների համար նախատեսված դպրոցական համազգեստը Վրաստանի բոլոր շրջաններում հնարավոր կլինի ձեռք բերել սեպտեմբերի 1-ից 14-ը՝ ինչպես հատուկ վաճառքի կետերում, այնպես էլ առցանց՝ հատուկ ստեղծված էլեկտրոնային հարթակի՝ formebi.emis.ge միջոցով։ Սեպտեմբերի 15-ից ծնողները համազգեստը կկարողանան ձեռք բերել միայն էլեկտրոնային հարթակի միջոցով։
Նշենք նաև, որ Կրթության նախարարության կողմից հաստատված կանոնների համաձայն՝ դպրոցական համազգեստի համար վճարումը կատարվելու է միայն անկանխիկ եղանակով։ Ֆիզիկական վաճառքի կետերում հնարավոր կլինի վճարել բանկային քարտով։
Առցանց գնումների դեպքում առաքումն իրականացնելու է «Վրաստանի փոստը»։ Առաքման արժեքը Թբիլիսիում կկազմի 5 լարի, իսկ շրջաններում՝ 7 լարի։ Համազգեստի առցանց վաճառքի կայքում նշված տեղեկատվության համաձայն՝ առաքումը կտևի 5-7 օր։
Եթե առաքիչը չկարողանա ապրանքը հանձնել իր այցելության ժամանակ, այն նույն օրը կվերադարձվի «Վրաստանի փոստի» համապատասխան սպասարկման կենտրոն։ Այնտեղ ապրանքը կպահվի առավելագույնը երեք աշխատանքային օր։ Այս ընթացքում «Կրթական ռեսուրսներ» ՍՊԸ-ն կապ կհաստատի ստացողի հետ՝ ապրանքը սպասարկման կենտրոնից ստանալու համար։ Եթե ապրանքը սահմանված ժամկետում չստացվի, այն կվերադարձվի «Կրթական ռեսուրսներ» ՍՊԸ-ին։
