Ռուսաստանը պատրաստ է ընդլայնել պրագմատիկ կապերը Վրաստանի հետ, հայտարարել է փոխարտգործնախարար Միխայիլ Գալուզինը ՏԱՍՍ-ին տված հարցազրույցում։
«Մենք բաց ենք Թբիլիսիի հետ պրագմատիկ կապերի հետագա ընդլայնման համար։ Ակնհայտ է, որ Վրաստանի հաջող զարգացման բանալին ոչ թե առճակատման, այլ մեր երկրի հետ համագործակցության մեջ է», — նշել է դիվանագետը։
«Ինչ վերաբերում է երկկողմ քաղաքական շփումներին, դրանք ներկայումս գոյություն չունեն։ Պատճառը վրացական կողմի՝ նման երկխոսության մեջ չներգրավվելու ցանկության մեջ է։ Ինձ համար, իհարկե, դժվար է դատել, թե ինչպես է սա օգնում Վրաստանին հաղթահարել որոշակի խնդիրներ, բայց դա նրա իշխանությունների որոշումն է»։
Ռուսաստանի արտաքին գործերի նախարարության ներկայացուցիչը նաև հայտարարել է, որ «հաշվի առնելով պատմական ճակատագրերի և աշխարհագրության սերտ միահյուսումը, Ռուսաստանը և Վրաստանը միմյանց համար բնական գործընկերներ են»։
«Դրա մասին է վկայում նաև այն փաստը, որ նույնիսկ Թբիլիսիի վրա աննախադեպ արտաքին ճնշումը և մեր երկրի հետ համագործակցությունից հրաժարվելու համար նրան ուղղված վերջնագրերը չունեցան այն ազդեցությունը, որին Արևմուտքը հույս ուներ»։
Գալուզինի խոսքով՝ Ռուսաստանի և Վրաստանի միջև հարաբերությունները հիմնված են դարավոր պատմական և մշակութային կապերի և ընդհանուր հոգևոր հիմքի վրա։
«Հայտնի քաղաքական տարաձայնություններից անկախ, մենք ձգտում ենք Վրաստանի հետ կառուցել փոխադարձ հարգանքի վրա հիմնված հարաբերություններ։ Իրոք, վերջին տարիներին զգալի առաջընթաց է գրանցվել առևտրային համագործակցության և զբոսաշրջության ոլորտում։ Վրաստան այցելող յուրաքանչյուր չորրորդ զբոսաշրջիկ Ռուսաստանից է, և մեր ընդարձակ շուկան Վրաստանի հիմնական արտահանման շուկան է։ Մենք ողջունում ենք սա, քանի որ մեր խնդիրն ենք համարում ստեղծել պայմաններ մարդասիրական և գործարար կապերի ընդլայնման համար, այլ կերպ ասած՝ այն, ինչը կարևոր է մեր երկրների քաղաքացիների համար»։
