Քութաիսիում մեկնարկել է ԹՈՒՄՈ ստեղծագործական տեխնոլոգիաների կրթական կենտրոնի գրանցումը։ Վրաստանի նորարարությունների և տեխնոլոգիաների գործակալության (GITA) տվյալներով՝ դեռահասները կարող են անվճար դասընթացներ անցնել 11 ժամանակակից ոլորտներում՝ ռոբոտաշինությունից և արհեստական բանականությունից ընդհուպ մինչև խաղերի մշակում։

Կենտրոնը գտնվում է Քութաիսիի տեխնոլոգիական կենտրոնում։ Ուսումը կլինի լիովին անվճար և ֆինանսավորվում է GITA-ի և Վրաստանի բանկի կողմից։

Դեռահասները կկարողանան ուսումնասիրել գրաֆիկական դիզայն, ծրագրավորում, 3D մոդելավորում, լուսանկարչություն, կինոարտադրություն, ռոբոտաշինություն, խաղերի մշակում, անիմացիա, երաժշտություն, գեներատիվ արհեստական բանականություն (Generative AI) և նկարչություն։

ԹՈՒՄՈ-ն միջազգային կրթական մոդել է, որն արդեն գործում է մի քանի երկրներում և համատեղում է ինքնուրույն ուսուցումը, գործնական սեմինարները և լաբորատոր աշխատանքները։

Ծրագիրը նախատեսված է 12-ից 18 տարեկան սովորողների համար։ Դասընթացները կսկսվեն սեպտեմբերի վերջին։

Ընտրության գործընթաց չկա։ Առաջին 600 գրանցված դեռահասներն ավտոմատ կերպով կընդգրկվեն ծրագրում։

Գրանցվել հնարավոր է առցանց կամ անձամբ Քութաիսիի տեխնոլոգիական կենտրոնի ԹՈՒՄՈ տարածքում, երեքշաբթիից շաբաթ, ժամը 11:00-ից մինչև 17:00-ը։

Գրանցվելու համար անհրաժեշտ է ծնողի կամ օրինական խնամակալի ներկայությունը։ Դեռահասները պետք է ունենան անձը հաստատող փաստաթուղթ կամ ծննդյան վկայական, իսկ ծնողները՝ անձը հաստատող փաստաթուղթ։

ԹՈՒՄՈ ստեղծագործական տեխնոլոգիաների կրթական կենտրոնը գործում է Ջավախքում, Ախալքալաքում՝ 2022 թվականից։ ԹՈՒՄՈ-ն հայկական, անվճար կրթական ծրագիր է դիզայնի և տեխնոլոգիաների ոլորտում մասնագիտացած դեռահասների համար։ ԹՈՒՄՈ կենտրոններ են գործում Հայաստանի տարբեր շրջաններում, ինչպես նաև միջազգային ԹՈՒՄՈ կենտրոններ Փարիզում, Բեռլինում, Մոսկվայում, Թեհրանում, Բեյրութում, Կիևում, իսկ այժմ՝ նաև Վրաստանի Քութաիսի քաղաքում։