Վրաստանի ներքին գործերի փոխնախարար Ալեքսանդրե Դարախվելիձեի խոսքով՝ խորհրդարան է ներկայացվել անօրինական միգրացիայի դեմ պայքարին վերաբերող կարևոր փոփոխությունների փաթեթ։

Նա նաև նշել է, որ վերանայվել է օտարերկրյա քաղաքացիներին ուսանողական բնակության թույլտվություն տրամադրելու վերաբերյալ օրենսդրությունը։

«Մենք խորհրդարանին ներկայացրել ենք անօրինական միգրացիայի վերաբերյալ կարևոր փոփոխություններ։ Սա բարեփոխումների երկրորդ փուլն է։ Հիշու՞մ եք, որ անցյալ տարի էական փոփոխություններ իրականացվեցին։ Դրանք արդեն դրական ազդեցություն են ունեցել, և հասարակությունն ամեն օր տեսնում է Վրաստանից արտաքսման դեպքեր, երբ անօրինական բնակվող օտարերկրյա քաղաքացիները, որոնք տարբեր մեխանիզմներ են օգտագործել երկրում երկար ժամանակ մնալու համար, արտաքսվում են։

Երկրորդ փաթեթն անցյալ տարի սկսված բարեփոխումների շարունակությունն է։ Այս անգամ վերանայվել է բնակության թույլտվություն տրամադրելու վերաբերյալ օրենսդրությունը։ Մինչ օրս օտարերկրյա քաղաքացիներին տրամադրվել է մոտ 35 000 ուսանողական բնակության թույլտվություն։ Բացահայտվել են դեպքեր, երբ այս կարգավիճակն օգտագործվել է ոչ թե ուսման, այլ երկրում երկարաժամկետ բնակության համար։

Փոփոխությունները միտված են ապահովելու, որ իրապես սովորող և իրենց բնակության թույլտվությունները նախատեսված նպատակներով օգտագործող ուսանողները չհանդիպեն որևէ խոչընդոտի: Միևնույն ժամանակ, խիստ կանոններ կգործեն նրանց նկատմամբ, ովքեր իրենց ուսանողական բնակության թույլտվություններն օգտագործում են միայն երկրում երկարատև մնալու համար, և պետությունը կընդունի միանշանակ դիրքորոշում։

Երկրորդ հարցը վերաբերում է ֆիկտիվ ամուսնություններին: Գործող օրենսդրության համաձայն, Վրաստանի քաղաքացու հետ ամուսնությունը բավարար է, որպեսզի օտարերկրյա քաղաքացին ստանա անժամկետ բնակության թույլտվություն: Ներկայումս երկրում կա մոտ 30 000 օտարերկրացի, ովքեր ստացել են մշտական բնակության թույլտվություն: Այնուամենայնիվ, այս ոլորտում վերահսկողության մեխանիզմները շատ թույլ էին»,-նշել է Ալեքսանդրե Դարախվելիձեն։

Ինչպես նշել է Դարախվելիձեն, ներդրվում է նաև հատուկ մեխանիզմ՝ ֆիկտիվ ամուսնությունները և դրանց հիման վրա բնակության թույլտվությունների ձեռքբերումը կանխելու համար։

«Շատ երկրներում գոյություն ունեն խարդախ սխեմաներ, որոնք ներառում են ֆիկտիվ ամուսնությունների կնքում՝ բնակության թույլտվություն ստանալու համար: Նոր մեխանիզմը պահանջում է, որ եթե օտարերկրյա քաղաքացին ամուսնանա Վրաստանի քաղաքացու հետ և դիմի բնակության թույլտվություն ստանալու համար, նա պարտավոր կլինի հարցազրույց անցնել հանձնաժողովի հետ։

«Եթե հանձնաժողովը հիմքեր գտնի կասկածելու ամուսնության իսկության մեջ, փաստաթղթերը կփոխանցվեն քննչական մարմիններին։ Ինչպես հայտնի է, Քրեական օրենսգրքում ավելացվել է նոր հոդված, որը նախատեսում է պատիժ ֆիկտիվ ամուսնությունների համար, եթե դրանց նպատակը երկրում օրինական բնակության իրավունք ստանալն է։

Այս մեխանիզմն առավելագույնս պաշտպանված կլինի չարաշահումներից, և բնակության իրավունք կտրամադրվի միայն նրանց, ովքեր իսկապես դրա կարիքն ունեն։ Երկրում երկարատև բնակության հնարավորություն չի լինի այն օտարերկրյա քաղաքացիների համար, ովքեր օրենքով նման իրավունք չունեն», — հայտարարել է Ալեքսանդրե Դարախվելիձեն։