2026-2027 ուսումնական տարվա համար հանրային ուսումնական հաստատություններում առաջին դասարանցիների գրանցման երրորդ փուլը՝ տարածքային սկզբունքով գրանցումը, կսկսվի մայիսի 15-ին, ժամը 9:00-ին և կտևի մինչև մայիսի 25-ի ժամը 00:00-ն։
Վրաստանի կրթության, գիտության և երիտասարդության նախարարության տվյալներով՝ գրանցումը կիրականացվի առցանց՝ Կրթության կառավարման տեղեկատվական համակարգի պաշտոնական կայքում։
«Երեխայի գրանցումը համակարգում ապահովում է ծնողը կամ օրինական խնամակալը։ Տարածքային գրանցումը կիրականացվի 12 պիլոտային քաղաքներում՝ Թբիլիսի, Բաթումի, Քութայիսի, Ռուսթավի, Զուգդիդի, Ամբրոլաուրի, Օզուրգեթի, Ախալցիխե, Գորի, Մցխեթա, Թելավի և Փոթի։ Գրանցումը հիմնված է Հանրային ծառայությունների զարգացման գործակալության էլեկտրոնային տվյալների բազայում 2026 թվականի ապրիլի 15-ի դրությամբ գրանցված հասցեի վրա։
Այն անձանց համար, ովքեր որպես բնակության վայր նշում են օկուպացված տարածքները (Աբխազիա, Ցխինվալի, Ախալգորի), դպրոցական շրջանը կորոշվի ներքին տեղահանված անձանց, էկոմիգրանտների հարցերով և կենսապահովման աջակցության գործակալության կողմից տրամադրված իրավաբանական հասցեի հիման վրա (2026 թվականի ապրիլի 15-ի դրությամբ)», — ասվում է հայտարարության մեջ։
Նախարարության տվյալներով՝ էլեկտրոնային եղանակով գրանցված աշակերտներին ընդունելու համար անհրաժեշտ փաստաթղթերը դպրոցներ կներկայացվեն մայիսի 27-ից մինչև հունիսի 12-ը։
Սահմանված ժամկետում փաստաթղթերը չներկայացնելու դեպքում գրանցումը կչեղարկվի ավտոմատ կերպով։ Առաջին դասարանցիներին տարածքային սկզբունքներով ընդունելու վերաբերյալ տեսաուսուցողական տեսանյութը կարող եք դիտել այստեղ։ Մինչև գրանցումը սկսելը կարող եք նախապես ստուգել, թե որ դպրոցներում է հնարավոր գրանցել ձեր երեխային։
Առաջին դասարան ընդունվելու համար անհրաժեշտ փաստաթղթերը՝
— աշակերտի օրինական ներկայացուցչի դիմումը, որը պետք է պարունակի տեղեկություններ օրինական ներկայացուցչի բնակության վայրի մասին և հեռախոսահամարը, ինչպես նաև համապատասխանի Վրաստանի ընդհանուր վարչական օրենսգրքի 78-րդ հոդվածով սահմանված այլ պահանջներին։
— օրինական ներկայացուցչի անձը հաստատող փաստաթղթի պատճենը և Վրաստանում բնակության իրավունքը հաստատող փաստաթղթի պատճենը (եթե այդպիսիք կան)։ Եթե փաստաթղթերը ներկայացվում են օտար լեզվով, դրանց պետք է կցվի վրացերեն թարգմանությունը՝ համաձայն Վրաստանի օրենսդրության։
— աշակերտի ծննդյան վկայականի կամ անձը հաստատող փաստաթղթի պատճենը կամ Վրաստանում բնակության իրավունքը հաստատող փաստաթղթի պատճենը (եթե այդպիսիք կան)։ Եթե փաստաթղթերը ներկայացվում են օտար լեզվով, դրանց պետք է կցվի նաև վրացերեն թարգմանությունը՝ համաձայն Վրաստանի օրենսդրության։
Վրաստանի կրթության, գիտության և երիտասարդության նախարարությունը կոչ է անում ծնողներին ուշադիր ուսումնասիրել գրանցման պայմաններն ու դրույթները՝ իրենց երեխայի դպրոցում ժամանակին և անխոչընդոտ ընդունելությունն ապահովելու համար», — ասվում է Կրթության նախարարության հայտարարության մեջ։
