Վրաստանի ենթակառուցվածքների նախարարության մունիցիպալ զարգացման հիմնադրամը հայտարարել է 14 հանրակրթական դպրոցների նախագծման և վերականգնման մրցույթներ: Նախագծերի իրականացման արդյունքում դպրոցները կսպասարկեն մինչև 8 հազար աշակերտի և կընդգրկեն ինչպես մարզերը, այնպես էլ մայրաքաղաքը:
Նախագծերը ներառում են Թբիլիսիի, Գորիի, Սամտրեդիայի, Ծղալտուբոյի, Զուգդիդիի, Մեստիայի, Սաչխերեի, Զեստաֆոնիի, Սագարեջոյի, Ախալցիխեի, Գարդաբանիի, Թելավիի և Ճիաթուրայի մունիցիպալիտետներում գտնվող դպրոցները: Դրանց թվում են Ատենի, Քվիտիրի, Շամգոնա, Քվեդա Սազանո, Մանավի, Ախալսոփելի և Փշավելի հանրակրթական դպրոցները, ինչպես նաև Սամտրեդիայի թիվ 11, Մեստիայի թիվ 1, Սաչխերեի թիվ 1, Ճորվիլայի, Ախալցիխեի թիվ 2, Թբիլիսիի թիվ 64 և Ճիաթուրայի թիվ 2 դպրոցները:
Պայմանագրերը նախատեսում են դպրոցների շենքերի վիճակի գնահատում և փորձագետների եզրակացության հիման վրա նորացման մանրամասն պլանների պատրաստում, ինչը ներառում է շենքերի ամբողջական վերականգնում և, անհրաժեշտության դեպքում, դրանց ամրացում:
Վերականգնողական աշխատանքները ներառում են դպրոցների հիմնական ենթակառուցվածքների կարգավորումը, ուսումնական և վարչական տարածքների թարմացումը և դրանց հարմարեցումը ժամանակակից կրթական գործընթացի պահանջներին: Կբարելավվեն ինժեներական հաղորդակցությունները, այդ թվում՝ կթարմացվեն ջեռուցման, օդափոխության և ջրամատակարարման համակարգերը: Կապահովվի անվտանգության չափանիշներին համապատասխան միջավայր և կիրականացվի տարածքների բարեկարգում:
Այս մասին տեղեկատվություն է տարածում ենթակառուցվածքների նախարարությունը:
