Նինոծմինդայի մունիցիպալիտետի Օրլովկա և Գորելովկա գյուղերի բնակիչները շարունակում են բախվել բնական գազի բացակայության խնդրին։ Չնայած տարիներ շարունակ տրվող խոստումներին՝ գազիֆիկացումը այդպես էլ չի իրականացվել։

Տեղացիների խոսքերով՝ խնդիրը վաղուց արդեն ոչ միայն կենցաղային, այլև սոցիալական և ֆինանսական ծանր բեռ է դարձել։

«Ճաշ պատրաստելու համար օգտագործում ենք գազի բալոն, որն արդեն շատ թանկ է դարձել։ Իսկ ձմռանը ստիպված եմ գնում 4 շարք փայտ, որի համար վճարում եմ 2400 լարի։ Այդ փայտը հազիվ է բավականացնում ամբողջ ձմռան համար», – ասում է Օրլովկա գյուղի բնակիչներից մեկը, ով ցանկացավ մնալ անանուն։

Նույն իրավիճակում են նաև հարևան Գորելովկա գյուղի բնակիչները։

«Ամեն տարի խոստանում են, ասում են՝ գազ կբերեն, ծրագրում են, հետո նորից մոռանում։ Իսկ մենք շարունակում ենք ցրտի մեջ ապրել, ամեն ձմեռ պայքարել՝ ինչպես տաքացնել տունը։ Փայտը և գազի բալոններն օր օրի թանկանում են», – ասում է Գորելովկայից Մհեր Քուրչանյանը։

Բնակիչներն ընդգծում են, որ իրենց գյուղերում եղանակները շատ ցուրտ են՝ ձմեռը ձգվում է ավելի քան 6 ամիս, աթարի հույսին չի կարելի մնալ, հետևաբար միակ տարբերակը վճարելն է՝ թանկ և երբեմն ոչ հասանելի գներով։

Արդյունքում՝ գազիֆիկացման բացակայությունը դարձել է բնակիչների ամենամեծ խնդիրը, որն ազդում է նրանց կենսապայմանների, առողջության, ինչպես նաև ֆինանսական կայունության վրա։

Տարիներ շարունակ հնչած խոստումներն արդեն չեն բավարարում։ Տեղացիները պահանջում են, որ խնդիրը վերջապես դուրս գա բյուրոկրատական փուլից և իրական լուծում ստանա։

Վրաստանի գազափոխադրող GGTC ընկերության կայքի տեղեկատվության համաձայն՝ 2024-2025 թթ. Ջավախքում գազիֆիկացվելու է  13 գյուղ․ 8-ը՝ Ախալքալաքում, իսկ 5-ը՝ Նինոծմինդայում․ Գորելովկա, Ժդանով, Սամեբա, Օրլովկա, Եֆրեմովկա գյուղերը: