Ախալքալաքի մունիցիպալիտետում խայթոցները գրեթե ամենօրյա երևույթ են դարձել: Սրա հետ մեկտեղ մարդկանց մոտ ուժեղանում են վախն ու խուճապը: Բայց համաճարակաբան Գայանե Իսպիրյանը խորհուրդ է տալիս ոչ թե խուճապի մատնվել, այլ պարզապես ուշադիր լինել և ժամանակին դիմել բժշկի, ոչ թե ինքնուրույն փորձել հեռացնել տիզը:

Անցած մի քանի օրերի ընթացքում Jnews-ին հայտնի է դարձել տզի խայթոցի 3-4 դեպքի մասին: Հիմնականում մակաբույծի «զոհերը» երեխաներն են, ովքեր բակում խաղում են կենդանիների հետ կամ գոմում: Այս բոլոր դեպքերում, մինչ այժմ բարդություններ չեն առաջացել:

Jnews- ը մեկ շաբաթ առաջ գրել էր, որ տզերի խայթոցներն Ախալքալաքում հաճախակի են դարձել, և նույնիսկ գրանցվել է մահացու ելք:

Իքսոդես տզի հաճախակի խայթոցներից մինչև մահացու ելքեր. Ինչպես պաշտպանվել

Թե ինչպես պաշտպանվել և ինչ անել, Jnews- ը գրել էր իր նախորդ հոդվածում: Բնակչության շրջանում խայթոցների դեպքերի աճի հետ մեկտեղ, խուճապը նույնպես մեծանում է: Երբ մարդիկ իրենց կամ իրենց երեխաների վրա տիզ են տեսնում, նրանք վախից անմիջապես սկսում են այն պոկել մարմնից, հեռացնել այն, ինչը պետք չէ անել:

«Առաջին հերթին, հարկավոր չէ այն ինքնուրույն հեռացնել մարմնից, որովհետև նրանք չեն կարող ամբողջությամբ այն դուրս հանել մարմնից, տզերն ամուր կպչում են մարմնին: Պարզապես պետք է անմիջապես դիմել բժիշկի, և պետք չէ վախենալ, եթե ժամանակին բուժեն, ապա մարդը կապաքինվի, իսկ եթե բժշկին ուշ են դիմում, ապա մահացության մակարդակը կազմում է 2% -ից 50% », – ասում է Գայանե Իսպիրյանը:

Համաճարակաբանի խոսքով, ամեն ինչ կախված է նրանից, թե անձը երբ է սկսել բուժվել, ինչպիսի առաջին բուժօգնություն է ստացել և օրգանիզմի առանձնահատկություններից:

Բժշկի հետ հարցազրույցի պահին, նրա մոտ էր եկել 5 տարեկան մի փոքրիկ պացիենտ, որին 9 օր առաջ խայթել էր տիզը: Աղջնակի գլխին տիզը հայտնաբերել էին ծնողները, վախից հեռացրել այն և մշակել վերքը: Բայց տզի գլխիկը մնացել էր աղջկա մաշկի տակ, այնուհետև նրան բերել էին հիվանդանոց, վիրաբույժը հեռացրել էր այն և վերամշակել խայթոցի տեղը: Աղջիկը երբեմն վատ է զգում իրեն, ջերմությունը բարձրանում է մինչև 37,5° C: Ծնողներն անհանգստանում են, որ վատառողջ վիճակը կարող է խայթոցից լինել: Նրանք պատրաստվում են ստուգել աղջկա արյունը՝ վիրուսի առկայության առումով:

Համաճարակաբան Գայանե Իսպիրյանը կարծում է, որ այս տիզը գուցե վիրուսակիր չի եղել, քանի որ տզի խայթոցից ջերմությունը կտրուկ բարձրանում է մինչև 39-40 ° C, իսկ 37.5° C ջերմաստիճանը, հնարավոր է, կապված է մեկ այլ հիվանդության հետ:

Համաճարակաբանը խորհուրդ է տալիս դեն չնետել խայթող մակաբույծին:

«Ոչ բոլոր տզերն են վիրուսային, կարելի է տիզն ուղարկել անալիզի և պարզել՝ վիրուսակիր է, թե անվտանգ: Եթե այս աղջկա ծնողները պահեին այն, մենք անմիջապես կուղարկեինք անալիզի և մինչև ինկուբացիոն շրջանի ավարտը նրանք արդեն կիմանային և չէին անհանգստանա: Հնարավոր է այս տիզը վիրուսային չէր, քանի որ միայն առաջին օրն է ջերմությունը բարձրացել 38° C », – ասում է համաճարակաբանը:

Նրա խոսքերով, վիրաբույժներն ամեն տարի մարդկանց մաշկից դուրս են հանում մոտ 50 տիզ: Տզերի սեզոնը սկսվում է գարնանը՝ ապրիլից, և տևում է մինչև հոկտեմբեր:

Բացի այն, որ տզերը լինում են անտառներում, մակաբույծը հաճախ ապրում է նաև կենդանիների վրա: 5-ամյա աղջիկ շատ է սիրում գոմում խաղալ հորթերի և ձիերի հետ, ծնողները կարծում են, որ տիզը երեխայի վրա է անցել կենդանիներից:

Համաճարակաբանը նշում է, որ մեր մոտ տզերի տարածման առումով անտառներն այնքան վտանգավոր չեն, ինչքան՝ կենդանիները:

Ախալքալաքի մունիցիպալիտետում տարածված են իքսոդես տզերը: Նրանք բնակվում են անտառներում և այնտեղ, որտեղ կան շատ ծառեր, սիրում է խոնավություն և հաճախ ապրում են կենդանիների մաշկի վրա: Այն հիվանդությունը, որը մարդուն փոխանցվում է տզերի խայթոցների միջոցով, կոչվում է Ղրիմ-Կոնգոյի հեմոռագիկ տենդ (Febris haemorrhagica crimiana) և համարվում է վիրուսային հիվանդություն: