Բաքու-Թբիլիսի-Կարս (ԲԹԿ) երկաթուղով բեռնափոխադրումները կվերսկսվեն մայիսի 20-ից, – հայտարարել է «Ադրբեջանական երկաթուղիներ» ՓԲԸ-ի նախագահ Ռովշան Ռուստամովը։ ԲԹԿ երկաթուղային գծի արդիականացումը՝ Բաքու-Թբիլիսի-Կարս երկաթուղային գծի վրացական հատվածի վերանորոգման և ընդլայնման աշխատանքները, որը համարվում է Միջին միջանցքի կարևոր հատվածը, արդեն ավարտվել են։
Մայիսի 20-ից կսկսվեն բեռնափոխադրումները ԲԹԿ երկաթուղային գծով։ Այս երկաթուղային գծի արդիականացման հիմնական նպատակն է բարձրացնել Միջին միջանցքի մրցունակությունը և ԲԹԿ-ն դարձնել միջանցքի հիմնական բեռնափոխադրումների զարկերակներից մեկը։
Շատ մեծ է ԲԹԿ երկաթուղային գծի կարևորությունը Չինաստանից և Կենտրոնական Ասիայի երկրներից Եվրոպա ցամաքային ճանապարհով Ադրբեջանի տարածքից բեռնափոխադրումների արագացման գործում։ Ընդլայնումից հետո ԲԹԿ-ի տարեկան թողունակությունը 1 մլն տոննայից հասել է 5 մլն տոննայի: Բեռնման ծավալը մինչև 5 մլն տոննա հասցնելու նպատակը որոշվել է նախագահ Իլհամ Ալիևի հանձնարարականի հիման վրա, և այս ուղղությամբ ընդլայնման աշխատանքներն ակտիվորեն սկսվել են անցյալ տարվանից»,- ասել է նա։
Այժմ, նշել է Ռուստամովը, ադրբեջանական երկաթուղին պատրաստ է բեռների մեծ մասը փոխադրել Կենտրոնական Ասիայից և Ասիայից Արևմուտք արդիականացված ԲԹԿ ճյուղով և հակառակը։
Հաղորդվում է, որ իրականացված աշխատանքների շրջանակում անցկացվել են՝ 61 կիլոմետր երկաթուղային գիծ, 98 կիլոմետր օդային գիծ, 172 կիլոմետր՝ 10 կՎ լարեր, 338 կիլոմետր՝ օպտիկամանրաթելային մալուխ։ Բացի այդ, 160 հազար խորանարդ մետր խճաքարի օգտագործմամբ և հատուկ տեխնիկայի միջոցով վերանորոգվել է ճանապարհը, 120 կիլոմետրանոց հատվածով եզրաքարեր են անցկացվել, ասֆալտապատվել են 41 կիլոմետր երկարությամբ հետիոտնային ու մայրուղային ճանապարհները։
Նշենք, որ անցյալ տարի Ադրբեջանի նախագահ Իլհամ Ալիևը հայտարարել էր, որ Բաքու-Թբիլիսի-Կարս երկաթուղում լրացուցիչ կներդրվի ավելի քան 100 մլն դոլար։ Նրա խոսքով՝ երկաթուղու թողունակությունը կավելանա հինգ անգամ՝ մինչև հինգ միլիոն տոննա։
ԲԹԿ երկաթուղին շահագործման է հանձնվել 2017 թվականի հոկտեմբերի 30-ին։ Ծրագրի շրջանակներում կառուցվել է Կարս-Ախալքալաք երկաթգիծը՝ 98 կմ երկարությամբ, որից 68 կմ-ը՝ Թուրքիայով, 30 կմ-ը՝ Վրաստանով, իսկ Վրաստանում իրականացվել է Ախալքալաք-Թբիլիսի 183 կմ երկարությամբ հատվածի վերակառուցումը։ Գծի վրացական հատվածի աշխատանքները ֆինանսավորել է Ադրբեջանը, որը Վրաստանին 775 մլն դոլար ընդհանուր գումարով երկու վարկ է տրամադրել։
ԲԹԿ-ի ընդհանուր երկարությունը 826 կմ է։ 2021 թվականին այս երկաթուղով բեռնափոխադրումների ծավալը կազմել է 476,9 հազար տոննա։
Հիշեցնենք, որ երբ 2019 թվականին պաշտոնական մակարդակով հայտարարեցին ԲԹԿ ճյուղի հնարավոր միացման մասին Ռուսաստանի երկաթուղուն, վրացական իշխանությունները կտրականապես հայտարարեցին, որ Բաքու-Թբիլիսի-Կարս երկաթուղին Վրաստանի, Ադրբեջանի և Թուրքիայի ռազմավարական նախագիծն է և ցանկացած այլ մասնակցի մասնակցությունը պետք է համաձայնեցվի բոլոր երեք երկրների կողմից:
