Կառավարությունը նախատեսում է սկսել նոր օդանավակայանի շինարարությունը մինչև 2024 թվականի սկիզբը, որը կտևի մոտ 3-4 տարի, ասել է Էկոնոմիկայի և կայուն զարգացման նախարար Լևան Դավիթաշվիլին։
Նրա խոսքով, այս տարի Կառավարությունը կորոշի՝ նոր օդանավակայան կկառուցվի՞, թե՞ կընդարձակվի գործողը։
«Կառավարության կարգադրությամբ մենք աշխատանքի ենք ընդունելու մի քանի միջազգային փորձագիտական խմբեր, խորհրդատվական ընկերություններ, որոնց հետ բանակցություններ են վարվել։ Այս ուղղությամբ որոշակի ուսումնասիրություններ արդեն կատարվել են, և այն ուսումնասիրությունները, որոնք այսօր պատրաստում են վրացի փորձագետները, պետք է վերաստուգվեն և արդեն համաշխարհային առաջատար փորձագետների հետ համատեղ լրացուցիչ ուսումնասիրություններ կատարվեն, որպեսզի մենք կայացնենք որոշում, որը առավելագույնս կհամընկնի ծրագրերի հետ, որն ընդհանուր առմամբ երկիրն ունի՝ ավիացիայի, այդ թվում՝ օդանավակայանների զարգացման առումով։ Այս տարի արդեն որոշումը մենք կունենանք՝ կկառուցվի՞ օդանավակայանը, թե՞ տեղի օդանավակայանի ընդլայնում կիրականացվի։ Տեղական օդանավակայանի զարգացման որոշակի ծրագրեր արդեն կան, սակայն նոր օդանավակայանի կոնկրետ պլանը, առնվազն՝ տեխնիկական պայմանները, կորոշվեն այս տարի։ Ուստի հուսով ենք, որ այս տարի կկարողանանք ընտրել ճարտարապետական ընկերություն։ Մեր ցանկությունն ու ծրագիրն է մինչև 2024 թվականի սկիզբ սկսել նոր օդանավակայանի շինարարությունը, որը հավանաբար կտևի մոտ 3-4 տարի»,- հայտարարել է նախարարը։
Հարցին, թե ինչու է ընտրվել նախկին Վազիանիի աերոդրոմի տարածքը, նախարարը պատասխանել է, որ Վազիանիի օդանավակայանն անվտանգության առումով գրավիչ տարբերակներից մեկն է, և այս դիրքը նավիգացիոն առումով շատ առավելություններ ունի։